عظمیٰ نیوز سروس
اننت ناگ// لیفٹیننٹ گورنر منوج سنہا نے ہفتہ کو جموں کشمیر کے 16 سیاحتی مقامات کو دوبارہ کھولنے کا اعلان کیا، جنہیں 22اپریل کو پہلگام میں سیاحوں پر گھنائونے حملے کے بعد احتیاطی تدابیر کے طور پر عارضی طور پر بند کر دیا گیا تھا۔ ان سیاحتی مقامات اور پارکس میں سے 8 جموں ڈویژن میں اور 8 سری نگر میں ہیں۔ وادی بیتاب اور پہلگام مارکیٹ اور پارکس، ویری ناگ گارڈن، کوکرناگ گارڈن اور اچھہ بل گارڈن 17 جون سے دوبارہ کھولے جائیں گے۔لیفٹیننٹ گورنر نے کہا کہ اسکے علاوہ جن سیاحتی مقامات کو دوبارہ کھولا جا رہا ہے ان میں بادام واری پارک، ڈک پارک، سرینگر میں تقدیر پارک، سرتھل، کٹھوعہ میں دھگر، دیوی پنڈی، سیاد بابا، ریاسی میں سولا پارک، ڈوڈا میں گلڈنڈا اور جئے ویلی اور ادھم پور میں پنچیری شامل ہیں۔ انہوں نے مزید کہا کہ دوبارہ کھولنا مرحلہ وار انداز میں ہوگا۔انہوں نے پہلگام میں ممبر قانون ساز اسمبلی، ڈی ڈی سی چیئرپرسنز اور وائس چیئرپرسنز، ٹور اینڈ ٹریول آپریٹرز، پونی والا ایسوسی ایشن اور ہوٹلرز ایسوسی ایشن کے وفد سے بھی ملاقات کی۔ انہوں نے وفد کو یقین دلایا کہ سیکورٹی کے مکمل جائزہ لینے کے بعد دیگر سیاحتی مقامات پر سے پابندیاں ہٹا دی جائیں گی۔’انتظامیہ کے مطابق، تمام دوبارہ کھولے گئے مقامات پر سخت سیکورٹی انتظامات کئے گئے ہیں۔ مقامی پولیس یونٹس، نیم فوجی دستے اور سول انتظامیہ مل کر ان مقامات پر سیکورٹی کی نگرانی کر رہے ہیں۔ سی سی ٹی وی نگرانی، چیک پوائنٹس اور ہنگامی رسپانس ٹیمیں بھی تعینات کی گئی ہیں تاکہ کسی بھی ممکنہ خطرے کا بروقت تدارک کیا جا سکے ۔سیاحت سے وابستہ مقامی سٹیک ہولڈرز، ہوٹل مالکان، اور ٹریول ایجنٹوں نے اس فیصلے کا بھرپور خیر مقدم کیا ہے اور امید ظاہر کی ہے کہ اس سے آنے والے دنوں میں سیاحوں کی آمد میں نمایاں اضافہ ہوگا۔انتظامیہ نے عوام اور سیاحوں سے اپیل کی ہے کہ وہ سیکورٹی اداروں کے ساتھ مکمل تعاون کریں اور چوکنا رہیں۔ عوامی اجتماعات، تقریبات، اور دیگر سیاحتی سرگرمیاں مرحلہ وار بحال کی جائیں گی، جن کا انحصار جاری سیکورٹی جائزوں پر ہوگا۔لیفٹیننٹ گورنر نے یہ بھی مشاہدہ کیا کہ آئندہ امرناتھ یاترا کشمیر میں سیاحت کو بحال کرنے میں مددگار ثابت ہوگی۔انہوں نے کہا”میں لوگوں سے درخواست کرتا ہوں کہ وہ آگے آئیں اور سالانہ امرناتھ یاترا کو کامیاب بنائیں، یہ یاترا صرف انتظامیہ یا سیکورٹی فورسز کی ذمہ داری نہیں ہے، یہ عوام کی یاترا ہے، ہر کسی کو اس میں اپنا حصہ ڈالنے میں فخر محسوس کرنا چاہئے،” ۔انہوں نے کہا کہ سیکورٹی ایجنسیوں نے ایک جامع سیکورٹی پلان تیار کیا ہے اوریاتریوں پر زور دیا کہ وہ مقررہ قافلے میں سفر کریں۔لیفٹیننٹ گورنر نے کہا کہ پچھلے کچھ سالوں میں، یاترا کو سپورٹ کرنے کے لیے بنیادی ڈھانچے میں نمایاں بہتری لائی گئی ہے جس میں بہتر سڑکیں، بہتر بجلی اور ٹیلی کام کنیکٹیویٹی، رہائش کی سہولیات میں اضافہ، اور حفاظتی نظام کو مضبوط بنانا شامل ہے۔لیفٹیننٹ گورنر نے ننون بیس کیمپ کا بھی دورہ کیا اور ڈیزاسٹر مینجمنٹ سنٹر اور یاتری نواس کی پیش رفت کا جائزہ لیا۔ انہوں نے 3 جولائی سے شروع ہونے والی یاترا کے لیے سیکورٹی اور دیگر انتظامات کا بھی معائنہ کیا۔
