عظمیٰ نیوزسروس
سرینگر//نیشنل کانفرنس کی عوامی نمائندہ سرکار لوگوں کے تمام مسائل و مشکلات کا ازالہ کرنے کیلئے برسر جہد ہے اور اُن وعدوں کو پورا کرنے کیلئے تمام وسائل بروئے کار لائے جارہے ہیں جن کا وعدہ انتخابی منشور میں کیا گیا ہے۔ ان باتوں کا اظہار انہوں نے اپنی رہائش گاہ پر بلاک ورکنگ کمیٹی ادھمپور کے اراکین کیساتھ تبادلہ خیالات کرتے ہوئے کیا ، جو ضلع صدر اھمپور سنیل ورما کی قیادت میں اُن سے ملاقی ہوئے۔ اس دوران ضلع میں پارٹی پروگراموں، تنظیمی سرگرمیوں اور لوگوں کو درپیش مسائل و مشکلات کے بارے میں تبادلہ خیالات کیا گیا۔ ملاقی ہونے والوں نے ضلع اھمپور کے لوگوں کے مسائل اُجاگر کرنے کیساتھ ساتھ اُن کے مطالبات کو بھی پارٹی صدر کے سامنے لایا اور انہیں پارٹی امورات کے بارے میں مکمل جانکاری دی۔ ڈاکٹر فاروق عبداللہ نے کہا کہ لوگوں کے مسائل کو کم کرنا موجودہ سرکار کی اولین ترجیح ہے کیونکہ لوگوں نے نیشنل کانفرنس کو اعتماد دیا ہے، اس پر عمل کیا جائے گا۔ ڈاکٹر فاروق نے پارٹی سے وابستہ افراد کو زمینی سطح پر پارٹی کو مضبوط کرنے پر زور دیااور کہا کہ وہ عوام، حکومت اور پارٹی کے درمیان ایک اہم پُل کے طور پر کام کریں۔ڈاکٹر فاروق عبداللہ نے کہا کہ دفعہ370اور35اے کشمیر سے زیادہ جموں کے لوگوں کو تحفظ فراہم کرتے تھے۔ آنجہانی مہاراجہ نے یہاں اسی لئے سٹیٹ سبجیکٹ کا قانون لاگو کیا تھا کیونکہ انہیں معلوم تھا کہ پنجاب کے سرمایہ کار جموں کے غریب عوام کی زمینیں سستے داموں خریدیں گے اور وہ خود بے گھر ہوجائیں گے۔ خصوصی پوزیشن کا خاتمہ ہونے کے بعد جموں کے لوگوں نے جشن منایا لیکن حقیقت سامنے آنے میں زیادہ دیر نہیں لگی، جموں کے عوام کو 9اگست2019کے فیصلوں کا خمیازہ بھگتنا پڑا اور آج بھی بھگت رہے ہیں لیکن بدقسمتی سے الیکشن کے دوران یہاں مذہب کے نام پر ووٹ مانگا گیا اور لوگوں کو گمراہ کیا گیا۔
