عظمیٰ نیوز سروس
سرینگر// لوک سبھا انتخابات سے قبل ووٹروں میں تحفظ اور اعتماد کا احساس پیدا کرنے کے لیے سیکورٹی فورسز نے ہفتہ کو وادی کشمیر میں فلیگ مارچ کیا۔حکام نے بتایا کہ فلیگ مارچ ضلعی پولیس اور سنٹرل آرمڈ پولیس فورسز(سی اے پی ایف)نے پوری وادی میں کیا۔انہوں نے کہا کہ فلیگ مارچ آئندہ پارلیمانی انتخابات کے پیش نظر کیا گیا۔حکام نے کہا کہ فلیگ مارچ معاشرے میں تحفظ اور ہم آہنگی کا احساس پیدا کرنے اور آزادانہ، منصفانہ اور بے خوف انتخابات کو یقینی بنانے کے لیے علاقے کے تسلط کی مشق کا حصہ ہیں۔انہوں نے بتایا کہ پولیس اور سی اے پی ایف کے سینئر افسران اور جوانوں نے فلیگ مارچ میں حصہ لیا۔
کشمیر میں لوک سبھا کی تین سیٹیں ہیں- اننت ناگ-راجوری، سری نگر اور بارہمولہ۔اننت ناگ- راجوری میں تیسرے مرحلے میں 7 مئی کو پولنگ ہوگی، سری نگر میں چوتھے مرحلے میں 13 مئی کو اور بارہمولہ میں پانچویں مرحلے میں 20 مئی کو پولنگ ہوگی۔ ادھرجموں و کشمیر پولیس نے ہفتہ کو ادھم پور لوک سبھا حلقہ کے لئے اپنے سیکورٹی پلان کا جائزہ لیا جو 19 اپریل کو پہلے مرحلے میں انتخابات ہونے جا رہی ہے۔پولیس کے ایک ترجمان نے بتایا کہ ڈپٹی انسپکٹر جنرل آف پولیس، ادھم پور-ریاسی رینج نے ادھم پور ضلع ہیڈکوارٹر میں سینئر افسران کے ساتھ میٹنگ میں پارلیمانی انتخابات کی تیاریوں کا جائزہ لیا۔انہوں نے کہا کہ تمام متعلقہ اور ہم آہنگ پہلوں پر تفصیل سے تبادلہ خیال کیا گیا، جس میں پولنگ بوتھ کے سیکورٹی پلان(مقام کی حساسیت کے مطابق)، اسٹرانگ روم کی سیکورٹی، الیکٹرانک ووٹنگ مشینوں (ای وی ایم) کے جمع کرنے اور تقسیم کرنے کے مرکز، مرکزی نیم فوجی دستوں کی انڈکشن اور ڈی انڈکشن، ٹرانسپورٹ اور روٹ پلان شامل ہیں۔ترجمان نے کہا کہ میٹنگ کے دوران مواصلاتی پلان، امن و امان، کسی بھی ہنگامی صورتحال میں ایس او پی، اوور گرانڈ ورکرز کی سرگرمیوں پر نگرانی، ہتھیار ڈالنے اور رہائی پانے والے دہشت گردوں، ہسٹری شیٹر اور افواہوں کو پھیلانے والے، سوشل میڈیا کا غلط استعمال، پولنگ پارٹیوں کی نقل و حرکت کی نگرانی، فورسزکی رہائش، جلسہ گاہوں کے لیے سیکورٹی پلان اور جلوس کے انتظامات / ریلیاں وغیرہ پر تفصیلی تبادلہ خیال کیا گیا۔انہوں نے کہا کہ میٹنگ میں سوشل میڈیا پر نظر رکھنے کے لیے اس کے غلط استعمال سے بچنے، پولنگ پارٹیوں کی نقل و حرکت کی نگرانی، سی اے پی ایف کی رہائش اور جلسہ گاہوں کے لیے سیکورٹی پلان اور جلوس اور ریلیوں کے انتظامات کی حکمت عملی بھی تیار کی گئی۔ انہوں نے کہا کہ پولیس کنٹرول رومز کو مضبوط بنا کر ملک دشمن عناصر کی تخریبی سرگرمیوں پر نظر رکھنے اور مناسب رپورٹنگ چینلز پر بھی زور دیا گیا۔
