عظمیٰ نیوز سروس
سرینگر //حج 2024 کیلئے پانچ روزہ مناسک حج کی ادائیگی کا آغاز آج یعنی جمعہ 14جون سے ہونے جارہا ہے جس دوران15لاکھ عازمین حج آج صبح سے منیٰ کی جانب روانہ ہوگئے ہیں۔ مناسک حج کا آغاز آج سے جبکہ رکن اعظم وقوف عرفات ہفتہ 15 جون کو ہوگا۔ فریضہ حج کی ادائیگی کیلئے لاکھوں عازمین حج لبیک الھم لبیک کی صدائیں بلند کرتے ہوئے جمعہ کی صبح نماز فجر کے بعد منی کی جانب روانہ ہو گئے ہیں جہاں وہ منیٰ میں آج دن بھر اور رات کو قیام کے دوران عبادات کریں گے اور ہفتہ 15 جون کی صبح نماز فجر کے بعد وقوف عرفات کیلئے میدان عرفات روانہ ہوں گے۔ہفتے کے روز عرفات میں حج کے خطبہ کے بعد ظہر اور عصر کی نماز ایک ساتھ ادا کی جائیگی۔ پھر مغرب سے پہلے حجاج کرام مزدلفہ روانہ ہوں گے جہاں وہ مغرب اور عشا کی نماز ایک ساتھ ادا کریں گے۔مزدلفہ میں حجاج کرام کھلے آسمان تلے رات گزاریں گے ، اورشیطان کو مارنے کیلئے کنکریاں اکھٹا کریں گے۔اتوار کی صبح نماز فجر کے بعد حجاج کرام منیٰ واپس روانہ ہوں گے جہاں وہ رمی جمرات کریں گے۔ پھر حجاج جانور وں کی قربان کریں گے۔ اس کے ساتھ ہی عازمین کا فریضہ حج مکمل ہو جائے گا جس کے بعد وہ اپنا سر منڈوا کر احرام کھول کر عام لباس پہنیں گے جب کہ خواتین اپنے چوتھائی سر کے بالوں کا انگلی کی ایک پور برابر بال کٹوائیں گی۔حجاج کرام 16 جون کو ہی بیت اللہ کے طواف کیلئے مکہ روانہ ہوں گے۔ سترہ جون بروز پیر کوحجاج کرام ایک بار پھر رمی جمرات کریں گے اور سارا دن اور رات عبادت میں گزاریں گے۔ 18 جون کو آخری بار تینوں شیطانوں کو کنکریاں مارنے کے بعد حجاج کرام مغرب ہونے سے پہلے منیٰ کی حدود سے نکل جائیں گے۔
