لبَّيك اللّهمّ لبَّيك، لبَّيك لا شريك لك لبَّيك وقوفِ عرفہ ادا ، حجاج مزدلفہ روانہ

 شیطان کو کنکریاں مارنے کے بعد آج قربانی کریں گے

یو این آئی

مکہ مکرمہ//حج کا رکن اعظم وقوف عرفہ جمعرات کو ادا کیا گیا۔ دنیا بھر سے آئے لاکھوں عازمینِ حج میدانِ عرفات میں جمع ہوگئے ، اورتاریخی مسجد نمرہ میں خطبہ حج سنا ۔حجاج کو پرسکون ماحول کی فراہمی کے لیے مسجد کے ایک لاکھ 25 ہزار مربع میٹر رقبے میں آرام دہ قالین بچھائے گئے ہیں، ماحول کو ٹھنڈا رکھنے کے لیے پھوار والے پنکھے نصب کیے گئے ہیں، جس سے درجہ حرارت میں اوسطاً 9 ڈگری سینٹی گریڈ کمی ہوتی ہے ۔عازمین حج نے خطبہ سننے کے بعد ظہر اور عصر کی نمازیں ادا کیں ، اور سورج غروب ہونے تک میدان عرفات میں وقوف کیا۔نماز مغرب کی ادائیگی کے بعد حجاج کرام میدان عرفات سے مزدلفہ روانہ ہوئے ، اور مزدلفہ میں مغرب اور عشا کی نمازیں ملا کر پڑھیں اور شیطان کو مارنے کے لیے کنکریاں جمع کیں ۔حجاج کرام مزدلفہ میں کھلے آسمان تلے رات گزاریں گے ، وقوف مزدلفہ کے بعد رمی کے لیے روانہ ہوں گے ، بڑے شیطان کو 7 کنکریاں ماریں گے اور قربانی کریں گے ، حجاج کرام حلق کرانے کے بعد احرام کھول دیں گے ۔11 ذوالحج( سنیچر) کو حجاج کرام چھوٹے ، درمیانے اور بڑے شیطان کو 7،7 کنکریاں ماریں گے ، رمی جمرات کے بعد حجاج کرام طواف زیارت کے لیے خانہ کعبہ روانہ ہوں گے ، طواف زیارت کے بعد حجاج کرام صفا مروہ کی سعی کریں گے ۔12 ذوالحج ( اتوار)کو زوال آفتاب کے بعد تینوں شیطانوں کو کنکریاں ماری جائیں گی، 13 ذوالحج( پیر) کو حجاج کرام رمی جمرات کے بعد منیٰ سے اپنی رہائش گاہ روانہ ہوجائیں گے ۔حکام کے مطابق دنیا بھر سے قریب 15 لاکھ سے زائد زائرین سعودی عرب پہنچ چکے ہیں، جس کے لیے انتظامات کو بہتر بنانے اور مسلسل لوگوں کو سہولیات فراہم کرنے کے لیے 40 مختلف حکومتی ادارے اور 2 لاکھ 50 ہزار سے افسران و اہلکار مختلف فرائض کے انجام دہی میں مصروف ہیں۔سعودی وزیر حج توفیق ال رابعیہ نے ‘ بتایا کہ حجاج کے لیے 50 ہزار اسکوائر میٹر کے علاقے کو شیڈز لگا کر گرمی سے بچانے کی کوشش کی گئی ہے جبکہ 400 کولنگ یونٹس بھی قائم کر دیے گئے ہیں۔