عظمیٰ مانیٹرنگ ڈیسک
بیروت//لبنان کی وزارت صحت نے کہا کہ لبنان میں گزشتہ 24 گھنٹوں کے دوران اسرائیلی فضائی حملوں میں 55 لوگوں کی موت ہوگئی اور 156 دیگر زخمی ہوئے ہیں۔وزارت کے مطابق، ضلع بعلبیک-ہرمل میں 11، نباتیہ گورنری میں 22، بیروت اور ماؤنٹ لبنان میں تین اور جنوبی گورنری میں 16 ہلاکتیں رپورٹ ہوئیں۔اسرائیلی افواج اور حزب اللہ کے درمیان 23 ستمبر سے محاذ آرائی خطرناک حد تک بڑھتے ہوئے کے ساتھ اسرائیلی فوج لبنان پر شدید فضائی حملہ کر رہی ہے ۔گزشتہ سال 08 اکتوبر 2023 سے ، حزب اللہ اور اسرائیلی افواج لبنان-اسرائیل سرحد سے متصل علاقے میں وسیع پیمانے پر جھڑپوں میں برسرپیکار ہیں۔ادھر لبنانی مزاحمتی تنظیم حزب اللہ نے اسرائیلی فوج کی لبنان میں داخل ہونے کی پہلی کوشش ناکام بنادی جس میں صیہونی فوج کو نقصان بھی پہنچا۔ حزب اللہ نے ٹیلی گرام پر اپنی پوسٹ میں بتایا کہ اسرائیلی فوج نے آج لبنان کی سرحد پر قائم علاقے ادیسہ سے لبنان میں داخل ہونے کی کوشش کی جس دوران اسرائیل فوج اور حزب اللہ جنگجووں کی خصوصی رضوان فورس کے درمیان تصادم ہوا۔حزب اللہ جنگجووں نے اسرائیلی فوجیوں کی لبنان میں زمینی راستے سے داخل ہونے کی کوشش ناکام بنا دی اور اس دوران اسرائیلی فوجیوں کے زخمی ہونے کی اطلاعات ہیں۔ لبنانی خبر ایجنسی کا کہنا ہے کہ کل صبح اسرائیل اور حزب اللہ کے درمیان ہونے والی جھڑپ میں 20 اسرائیلی سپاہی زخمی ہوئے جنہیں ہیلی کاپٹروں کے ذریعے اسرائیلی اسپتالوں میں منتقل کیا جارہا ہے جب کہ کچھ اسرائیلی فوجیوں کی ہلاکتوں کی بھی اطلاع ہے مگر اس حوالے سے ابھی کچھ واضح نہیں ہے ۔ یاد رہے کہ اسرائیل نے اپنی فوج کی ڈویژن 98 جوکہ 10 سے 20 ہزار فوجیوں پر مشتمل ہے اسے لبنان کی سرحد پر تعینات کر رکھا ہے ۔
