لاک ڈاون کا تعین

 سرینگر//وادی کشمیر میں کووڈ کے مثبت معاملات میں اضافہ کو دیکھتے ہوئے انتظامیہ کی جانب سے ہفتہ وار لاک ڈاون کے نفاذ پر تبصرہ کرتے ہوئے ڈاکٹرس ایسوسی ایشن کشمیر نے کہا ہے کہ لاک ڈائون کا تعین ہسپتالوں میں مریضوں کے داخلہ کی نوعیت کو دیکھ کر کیا جانا چاہئے اور اس وقت ہسپتالوں میں ایسے مریضوں کی تعداد کم ہے جن کی حالت تشویشناک ہو ۔ کرنٹ نیوز آف انڈیا کے مطابق ڈاکٹرز ایسوسی ایشن کشمیر نے پیر کو کہا کہ لاک ڈاؤن کا فیصلہ مثبت کیسوں کی تعداد کے بجائے کووڈ کے ساتھ اسپتال میں داخل مریضوں کی تعداد کی بنیاد پر کیا جانا چاہئے۔ڈاک کے صدر اور انفلوئنزا کے ماہر ڈاکٹر نثار الحسن نے کہاکہ ہسپتال میں داخل ہونے کی شرح، نہ کہ کیسز کی تعداد کودیکھ کر پابندیوں کا تعین کرنا چاہیے۔انہوں نے کہا کہ مثبت معاملات کی تعداد پر پابندیاں لگانا صحیح نہیں ہے ۔انہوں نے کہا کہ وبائی مرض کے شروع میں روزانہ کیسز کی گنتی کو پابندیاں لگانے کیلئے ایک بیرومیٹر کے طور پر استعمال کیا جاتا تھا کیونکہ اس وقت کیسز میں اضافہ لامحالہ ہسپتالوں میں داخل ہونے میں اضافے کا باعث بنتا تھا۔ڈاکٹر نثارالحسن نے کہا کہ اومیکرون سے اب کووڈ مریضوں کا پیمانہ بدل گیا ہے ۔ انہوں نے کہا کہ اگرچہ اومیکرون قسم بہت زیادہ انفیکشن کا سبب بنتی ہے، لیکن زیادہ تر انفیکشن ہلکے ہوتے ہیں۔ اگرچہ مثبت کی شرح زیادہ ہے، زیادہ تر معاملات میں ہسپتال میں داخل ہونے کی ضرورت نہیں ہوتی ہے۔اس لئے لاک ڈائوں سے اس تعداد میں کمی نہیں ہوگی ۔ ڈاک کے صدر نے کہا کہ ہمیں یہ تسلیم کرنے کی ضرورت ہے کہ اومیکرون ہمارے چاروں طرف موجود ہے اور یہ کسی کو بھی متاثر کر سکتا ہے۔ ہمیں اب مختلف قسم کے ہر ایک کیس کی شناخت اور ان کا نظم کرنے کی ضرورت نہیں ہے۔انہوں نے کہا کہ مثبت معاملات کی تعداد نے مطابقت کھو دی ہے۔ جب وبائی امراض کے خطرے کا اندازہ لگانے کی بات آتی ہے تو اسپتال میں داخل ہونے والے نمبر اب قابل اعتماد نشان ہیں۔’’ہمیں اپنی توجہ کووڈ سے متعلقہ اسپتالوں میں داخل ہونے، بیڈوں کے استعمال اور وینٹی لیٹرز پر مریضوں کی تعداد پر مرکوز کرنی چاہیے۔‘‘انہوں نے مزید کہا کہ لاک ڈائون جیسی سخت پابندیاںعائد کرنے کیلئے یہی پیمانہ ہونا چاہئے نہ کی مثبت معاملات کی مجموعی تعداد ۔اس دوران ڈاک کے جنرل سیکرٹری ڈاکٹر ارشد علیٰ نے کہا کہ کیسز کو ٹریک کرنے کی وجہ یہ تھی کہ ہم امید کر رہے تھے کہ ہم وائرس کو ختم کر سکتے ہیں،لیکن یہ وائرس کی فطرت میں نہیں ہے کہ اسے ختم کیا جائے، انہوں نے مزید کہا کہ ہمیں وائرس کے ساتھ رہنا ہے اور یہ ہمارے ساتھ رہے گا۔اس ضمن میں ڈاک کے ترجمان ڈاکٹر ریاض احمد ڈگہ نے کہا کہ ہم وبائی مرض کے ایک ایسے موڑ پر پہنچ گئے ہیں جہاں پالیسی اب اس خیال پر مبنی نہیں ہونی چاہیے کہ جب تک کیس نمبر ایک خاص سطح سے نیچے نہ ہو ہم معمول کی زندگی دوبارہ شروع نہیں کر سکتے۔