وادی کے اندر گزشتہ چار ماہ سے جاری ایجی ٹیشن کے دوران حکومت نے صورتحال کو قابو کرنے کی غرض سے جو کاروائیاں کی ہیں اور، جنہیں سیاسی و سماجی اور قانونی حلقوں میں ناپسندیدہ نگاہوں سے دیکھا جا رہا ہے، میں بھاری پیمانے پر گرفتاریوں کا سلسلہ انتہائی اہم ہے۔ وادی کے طول و عرض میں شاید ہی کوئی ایسا مقام ہو جہاں جلسے جلوسوں اور احتجاجوں میں شرکت کرنے پاداش میں داروگیر کا سلسلہ دراز نہ کیاگیا ہو، جبکہ پتھرائو کے الزام میں دھر لئے گئے نوجوانوں کو سرکاری زبان میں جنگجوئوں کے ہم پلہ قرار دینے میں کوئی کسر اُٹھائے نہیں رکھی جارہی ہے۔ بہر حال ایجی ٹیشنوں سے پیدا ہونے والے حالات سے نمٹنا انتظامیہ کا کام ہوتا ہے ، لیکن جمہوریت میں ہر کام کی انجام دہی کیلئے قوانین، اصول اور ضوابط موجود ہیں اور جب ان مسلمہ قوانین اور ضوابط سے انحراف کرنے کی کوشش کی جائے تو اسکے منفی عواقب سامنے آنا ایک لازمی امر ہے۔ حالیہ ایجی ٹیشن کے دوران گرفتار شدگان کو ریاست کی مختلف جیلوں میں قید رکھا گیا ہے، جس میں سے کئی ایک حراستی قانون پبلک سیفٹی ایکٹ کے تحت بند ہیں۔ مزاحمتی خیمے کی جانب سے اکثر یہ الزام تراشیاں کی جارہی ہیں کہ جیلوں میں زیر حراست قیدیوں کے حقوق پامال کئے جارہے ہیں اور انہیں مختلف طریقوں سے تکلیفیں پہنچائی جارہی ہیں۔ اگر چہ حکومت کی جانب سے اس ضمن میں ابھی تک کوئی وضاحت سامنے نہیں آئی ہے لیکن یکم نومبر کو بارہمولہ سب جیل میں پیش آمدہ واقعات سے جیلوں کے اندر قیدیوں کی صورتحال کا اندازہ لگانا کچھ زیادہ مشکل بھی نہیں ہے۔ ہائی کورٹ بار ایسوسی ایشن کی ایک رپورٹ کے مطابق ایک زیر سماعت قیدی کی طبیعت خراب ہو جانے پر ساتھی قیدیوں نے اسکے علاج و معالجہ کے انتظامات کروانے کیلئے زور دیا، جس کی جانب جیل حکام کی جانب سے کوئی توجہ نہیں دی گئی ہے، نتیجتاً قیدیوں نے برہم ہو کر جیل کے اندر احتجاجی مظاہرے کئے۔ رپورٹ کے مطابق جیل حکام نے صورتحال کو قابو کرنے کیلئے پولیس کی مدد طلب کی جس نے جیل کی چار دیواری کے اندر قدیوں کی مارپیٹ کرکے انہیں بیروکوںکے اندر واپس بند کر دیا۔ چنانچہ حکام کی اس حرکت ، جس میں متعدد قیدی زخمی ہوئے، کے خلاف قیدیوں نے کئی روز تک بطور احتجاج بھوک ہڑتال کر دی۔ ایک عام بات، جو اکثر فراموش کر دی جاتی ہے ، وہ یہ ہے کہ جیل کے اندر قیدی خواہ زیر حراست ہوں یا سزا یافتہ اپنے بنیادی حقوق سے محروم نہیں ہوتے بلکہ انہیں آزادیٔ نقل و حرکت کے ماسوا وہ تمام حقوق میسر رہتے ہیں، جنکے عام لوگ حقدار ہوتے ہیں، لہٰذا اس اعتبار سے اگر قید و بند کی صورت میں کوئی شخص صحت کے مسائل سے دو چار ہو جاتا ہے تو سے بروقت طبی امداد فراہم کرنا جیل حکام کی ذمہ داری بنتی ہے اور اس سے کسی بھی قسم کا انکار قیدیوں کے بنیادی حقوق کی پامالی سے مختلف نہیں ، جو دنیا کے کسی بھی تسلیم شدہ قانون میں قابل قبول نہیں ہوسکتا۔تاریخی اعتبار سے جیلوں کے اندر قیدیوں کی مارپیٹ کرنا سامراجی اور آمرانہ حکومتوں کا طرز عمل رہا ہے لیکن جمہوری مملکتی انتظام میں ایسی کوئی گنجائش موجود نہیں ۔ ریاست کے اندر جیلوں میں محبوس افراد کو عدالتوں میں وقت پر پیش نہ کئے جانے کے معاملات بھی آئے روز خبروں میں آتے رہتے ہیں،جس کی وجہ سے یہ قیدی بروقت سماعت سے محروم رہ جاتے ہیں اور یقینی طور پر یہ انصاف سے محرومی کے مترادف ہے۔ ان معاملات کے حوالے سے اکثر قیدیوں کی ہمراہی کیلئے حفاظتی عملہ کی قلت کو بطور دلیل پیش کیا جاتا ہے۔ حالانکہ یہ محکمہ پولیس کی ذمہ داری بنتی ہے کہ وہ قیدیوں کو جیلوں سے عدالت لے جانے کیلئے جیل انتظامیہ کو بھر پور اور بر وقت تعاون فراہم کرے۔ اگر ایسا کرنے میں تاخیر ہوتی ہے تو اُسے جائز قرار نہیں دیا جاسکتا اور اگر مزاحمتی خیمہ اسے انتقام گیری سے تعبیر کرتا تو اسے بے جابھی نہیں کہا جاسکتا۔ حکومت کو اس ساری صورتحال کا جائزہ لیکر جیلوں کے اندر انتظامات کو بہتر بنانے میںپہل کرنی چاہئے تاکہ قید و بند کی صعوبتوں میں مبتلا شہریوں کے حقوق کی پامالی نظام کا حصہ نہ بنے۔
قیدیوں کے حقوق… احترام لازم!
