ہندوستان کی روح، خودداری اور اجتماعی شعور کا استعارہ :منوج سنہا
جموں//جموں و کشمیر کے لیفٹیننٹ گورنر منوج سنہا نےمحکمہ ثقافت کی جانب سے منعقدہ قومی ترانے ’وندے ماترم‘ کی 150ویں سالگرہ کی تقریب میں شرکت کرتے ہوئے کہا کہ ہمارا عزم اور مادرِ وطن کے تئیں ہماری غیر متزلزل وابستگی ہی بھارت کو ایک ترقی یافتہ، ’وِکست بھارت‘ بنانے کی بنیاد ہے۔لیفٹیننٹ گورنر نے اس موقع پر ’وندے ماترم‘ کے خالق بنکم چندر چٹوپادھیائے کو بھرپور خراج عقیدت پیش کیا اور قومی ترانے پر مبنی نمایش کا بھی دورہ کیا۔ انہوں نے کہا کہ رشِی بنکم چندر نے ماں بھارتی اور اس کے بیٹوں کے درمیان روحانی اور قومی رشتہ مضبوط کیا اور ان کے تخلیق کردہ ترانے نے عوام میں آزادی کی جدوجہد کا جوش بھرا۔سنہا نے اپنے خطاب میں کہا’’ہمارا مادرِ وطن کے تئیں جذبۂ خدمت اور عزم ہی ہمیں ترقی یافتہ بھارت کی منزل تک لے جائے گا۔ نئی نسل کو یاد رکھنا چاہیے کہ وہ ایک عظیم تہذیب کے وارث ہیں، اور معاشرتی خوشحالی و ترقی میں ان کا کردار ماں بھارتی کے لیے حقیقی خراجِ عقیدت ہوگا‘‘۔ 2025کو ’وندے ماترم‘ کے تخلیق کے 150 سال کے طور پر منایا جا رہا ہے۔ یہ قومی ترانہ بنکم چندر چٹوپادھیائے نے 7نومبر 1875کو اکشے نوامی کے موقع پر تحریر کیا تھا۔ یہ نغمہ پہلی بار ان کے ناول ’آنند مٹھ‘ کا حصہ بن کر رسالہ ’بنگ درشن‘ میں شائع ہوا تھا۔یہ ترانہ، جس میں بھارت ماتا کو طاقت، خوشحالی اور الوہیت کی علامت کے طور پر پیش کیا گیا ہے، ملکی اتحاد، خود اعتمادی اور بیداری کی روحانی ترجمانی بن گیا۔ ’وندے ماترم‘ نے آزادی کی تحریک کے دوران لاکھوں ہندوستانیوں کے دلوں میں حب الوطنی کی چنگاری روشن کی اور آج بھی یہ قومی یکجہتی کی علامت ہے۔اس موقع پر ایک اجتماعی گائیکی تقریب کا بھی اہتمام کیا گیا، جس میں مختلف طبقہ ہائے فکر سے تعلق رکھنے والے شہریوں نے قومی ترانے کی مکمل دھن میں حصہ لیا۔تقریب میں رکن پارلیمان جگل کشور شرما، راجیہ سبھا کے رکن غلام علی کھٹانہ، چیف سکریٹری اتل ڈلّو، ہوم پرنسپل سکریٹری چندرکر بھارتی، پرنسپل سکریٹری کلچر برج موہن شرما، آئی جی پی جموں بھیم سین توتی، ڈویژنل کمشنر جموں رمیش کمار سمیت متعدد اعلیٰ افسران، تعلیمی اداروں کے سربراہان، نوجوان اور ممتاز شہری موجود تھے۔جموں و کشمیر کے مختلف اضلاع سے بھی عوام اور حکام نے ورچوئل موڈ کے ذریعے تقریب میں شرکت کی، جس سے یہ تقریب ایک ریاستی سطح کی یادگار تقریب بن گئی۔لیفٹیننٹ گورنر سنہا نے اختتام پر کہا کہ وندے ماترم صرف ایک ترانہ نہیں بلکہ ہندوستان کی روح، خودداری اور اجتماعی شعور کا استعارہ ہے، جو ہر شہری کو وطن کی خدمت کا پیغام دیتا ہے۔
وادی بھرمیں تقریبات کا اِنعقاد
شرکاء نے وزیراعظم کے خطاب کی براہِ راست نشریات دیکھی
شرکاء نے وزیراعظم کے خطاب کی براہِ راست نشریات دیکھی
عظمیٰ نیوز سروس
سرینگر//گورنمنٹ کالج آف ایجوکیشن سری نگر نے کل یہاں قومی گیت’وندے ماترم ‘ کی تاریخی ، ثقافتی اور حب الوطنی کی اہمیت کو مناتے ہوئے اس کے 150سال پورے ہونے کی یاد می ںایک ضلعی سطح کی تقریب کا اِنعقاد کیا۔اِس موقعہ پرایڈیشنل چیف سیکرٹری ہائیر ایجوکیشن شانت منو مہمان خصوصی تھے۔اِس موقعہ پر ڈائریکٹر کالجز پروفیسر شیخ اعجاز بشیر، سی اِی او سری نگر، ایس ڈِی ایم ایسٹ، فیکلٹی ممبران اورطلبأ کی بڑی تعداد بھی موجود تھی۔ تقریب کا آغاز وزیراعظم نریندر مودی کی قیادت میں قومی سطح پر منعقدہ پروگرام کی براہِ راست نشریات کے ذریعے اِجتماعی انداز میں ’وندے ماترم‘ کے ترانے سے ہوا۔ اِس کے بعد پرچم کشائی کی تقریب ایڈیشنل چیف سیکرٹری نے انجام دی اور قومی ترانہ گایا گیا۔ تقریب کا آغاز ایک باوقار اور حب الوطنی سے بھرپور انداز میں ہوا۔پرچم کشائی کے بعد گورنمنٹ کالج فار وومن ایم اے روڈ سر ی نگر کے شعبہ موسیقی نے آئی اے ایس اِی کی ثقافتی کمیٹی کے اشتراک سے ’وندے ماترم‘ کا مدھر گیت پیش کیا ۔تقریب کے شرکأ نے وزیراعظم کے قومی خطاب کی براہِ راست نشریات دیکھی جو ملک گیر سطح پر منعقدہ پروگرام کا حصہ تھی۔ادھرضلع انتظامیہ سرینگرنے ڈی سی آفس کے میٹنگ ہال میں UT اور قومی سطح کے پروگراموں کی لائیو سٹریمنگ کی میزبانی کی۔ڈپٹی کمشنر سری نگر، اکشے لابرو نے ضلع انتظامیہ کے سینئر افسران اور تمام افسران اور اہلکاروں کے ساتھ ملک گیر یادگاری پروگرام کے حصے کے طور پر یو ٹی اور قومی سطح کے پروگراموں کی لائیو سٹریمنگ دیکھی اور وزیر اعظم نریندر مودی کے خطاب کا براہ راست ٹیلی کاسٹ دیکھا۔اسی طرح کی تقریبات پلوامہ ،اننت ناگ ،شوپیان ،کولگام ،کپوارہ ،بارہمولہ ،بانڈی پورہ اور وادی کے دیگر اضلاع میں منعقد ہوئیں ۔
