یومِ آزادی سے قبل باریک بینی سے تلاشی، گاڑیوں کی چیکنگ
سرینگر// 15اگست یومِ آزادی کے پیش نظر جموں و کشمیر میں سیکورٹی کو غیر معمولی حد تک سخت کر دیا گیا ہے۔یوم آزادی کی سب سے بڑی تقریب بخشی سٹیڈیم سرینگر میں منعقد ہونے والی ہے۔ سیکورٹی حکام کے مطابق، جموںسرینگر قومی شاہراہ پر جدید ترین وال ریڈار اور تھرمل اسکریننگ آلات نصب کر دیئے گئے ہیں، جن کے ذریعے گاڑیوں اور مسافروں کی لمحہ بہ لمحہ مانیٹرنگ کی جا رہی ہے۔ ان جدید ٹیکنالوجیز کا مقصد کسی بھی مشکوک سرگرمی یا خطرے کو بروقت شناخت کر کے کارروائی کو یقینی بنانا ہے۔ وادی کے داخلی و خارجی راستوں کے علاوہ اہم شاہراہوں، پلوں اور بس سٹینڈز پر بھی سخت ناکے قائم کر دیئے گئے ہیں۔ جگہ جگہ فورسز اہلکار جامہ تلاشی لے رہے ہیں، دو پہیہ گاڑیوں کی خصوصی طور پر باریک بینی سے جانچ کی جا رہی ہے اور شناختی کارڈ کی تصدیق کے بعد ہی آگے جانے کی اجازت دی جا رہی ہے۔عینی شاہدین کے مطابق، کئی مقامات پر فورسز نے راہگیروں کو بھی چیکنگ کے عمل سے گزارا، جبکہ مشکوک سامان کی فوری تلاشی لی جا رہی ہے۔ ایک سینئر پولیس افسر نے بتایا کہ ہم کسی بھی خطرے کو معمولی نہیں سمجھ رہے، فورسز دن رات الرٹ ہیں اور نگرانی کا دائرہ وسیع کر دیا گیا ہے۔حساس علاقوں میں سی سی ٹی وی نگرانی کے ساتھ ساتھ ڈرونز بھی فضائی نگرانی پر مامور ہیں۔ تھرمل امیجنگ آلات سے رات کے اوقات میں بھی مشکوک نقل و حرکت کو پہچاننے کا کام کیا جا رہا ہے، تاکہ دشمن کی کسی بھی ناپاک کوشش کو شروع میں ہی ناکام بنایا جا سکے۔سیکورٹی ایجنسیوں کے مطابق، ماضی میں یومِ آزادی کے موقع پر دشمن عناصر کی طرف سے تخریبی سرگرمیوں کی کوششیں کی جاتی رہی ہیں، اسی لیے کثیر سطحی حفاظتی منصوبہ اپنایا گیا ہے، جس میں زمینی، فضائی اور ٹیکنالوجی پر مبنی نگرانی شامل ہے۔
