عظمیٰ نیوز سروس
جموں// لیفٹیننٹ گورنر منوج سنہا نے جمعرات کومنڈل میں سنت ہرے رام داس پبلک اسکول کی سالانہ تقریب میں شرکت کی۔ لیفٹیننٹ گورنر نے شری شیو مندر نیاس ٹرسٹ کے ذریعہ چلائے جانے والے اسکول کی تعلیم، سماج کی فلاح و بہبود، انضمام اور یکجہتی میں اہم شراکت کے لئے تعریف کی ۔لیفٹیننٹ گورنر نے تدریسی برادری کو پنڈت مدن موہن مالویہ اور ڈاکٹر سرو پلی رادھا کرشنن کی اقدار اور نظریات کو فروغ دینے اور نوجوان نسل کو سماج اور قوم کے تئیں اپنا فرض ادا کرنے کی رہنمائی کرنے پر زور دیا۔
انہوں نے کہا کہ وزیر اعظم نریندر مودی جی کی رہنمائی میں تعلیمی اصلاحات نے تدریسی طریقہ کار کو اَپ گریڈ کیا ہے اور نوجوان نسل کی پرورش کے لئے مزید آزادی فراہم کی ہے۔لیفٹیننٹ گورنر نے مزید کہا کہ قومی تعلیمی پالیسی پر صحیح معنوں میں عمل درآمد کو یقینی بنانا بھی ہماری مشترکہ ذمہ داری ہے۔شری ہرے رام داس جی مہاراج نے اس موقع پر اظہار خیال کرتے ہوئے سنت ہرے رام داس پبلک اسکول اور شری شیو مندر نیاس ٹرسٹ کے طلبہ کو ان کی مجموعی ترقی کے لیے اقدار پر مبنی تعلیم فراہم کرنے کے عزم کا اعادہ کیا۔لیفٹیننٹ گورنر نے تعلیمی اور متنوع شعبوں میں شاندار کارکردگی دکھانے والے طلباء کو مبارکباد پیش کی اور اس موقع پر اسکول کے احاطے میں ایک درخت کا پودا بھی لگایا۔سابق قانون سازوں؛ سابق RI ممبران؛ مذہبی سربراہان، اسکول انتظامیہ اور شری شیو مندر نیاس ٹرسٹ کے اراکین، اساتذہ، طلباء اور والدین موجود تھے۔
