فرحی نعیم
’’امّی! مجھے یہ والا نہیں، حمزہ کے موبائل جیسا موبائل چاہیے تھا۔‘‘ فاروق نے مچلتے ہوئے کہا۔’’مگر بیٹا! وہ تو بہت ہی مہنگا ہے۔ ابھی یہ رکھ لو، بعد میں لے دیں گے۔‘‘ماں نے سمجھاتے ہوئےکہا۔’’نہیں، نہیں، بس مجھے ویسا ہی موبائل چاہیے اور وہ بھی اسی ہفتے۔‘‘ فاروق کے لہجے میں ضد تھی اور ماں کی آنکھوں میں بے بسی۔’’میںیہ کھانا نہیں کھاؤں گی، مجھے ،وہ کھانا چاہئے۔‘‘ چلو آج یہ کھالو ،کل تمہارے لئے وہ کھانا بناکے رکھوں گی ۔‘‘ امّی کے لہجے سے فکر مندی عیاں تھی۔ گھروں اور بازاروں میں اس طرح کی باتیں اب ہمارے معاشرے میں تقریباً عام ہوچُکی ہیں۔ چاہے کوئی صاحبِ حیثیت ہویا نہ ہو، مگر اُسے ہر صُورت اپنوں کی فرمائشیں پوری کرنی ہوتی ہیں۔خواہ اس کے لیے کسی سے قرض لینا پڑے یا پھر اپنی کسی اہم ضرورت کو پسِ پشت ڈالنا پڑے۔ دراصل اس میں زیادہ قصوروارخود والدین ہیں کہ اگر بچپن ہی سےبچّوں کی درست طریقے سے رہنمائی نہ کی جائے، تو بڑے ہوکرسمجھ دار اور با شعور ہونے کے باوجود وہ ضد، اصرار اور ہٹ دھرمی کی راہ پر چل پڑتے ہیں۔
بعض اوقات تو مَن چاہی شے کے حصول کی خاطر جائز، ناجائز اور حلال، حرام کی بھی تمیز کھو بیٹھتے ہیں۔ضروت اس امر کی ہے کہ والدین اپنے بچّوں کی بے جا خواہشات پوری کرنے کے بجائے شروع ہی سے اُنہیں قناعت کی اہمیت سے آگاہ کریں اور اختیار کرنے کی تعلیم بھی دیں۔ پھر بچّوں کو ضرورت اور آسائش کا فرق بھی سمجھائیں۔ انہیں یہ بھی بتائیں کہ کس وقت کون سی شے ضروری ہے، کون سی نہیں۔ کسے ترجیح دی جائے اور کسے آئندہ کے لیے موخر کیا جاسکتا ہے۔ ’’کم خرچ، بالا نشین‘‘ کے سُنہری اصول پر عمل کرنا سکھائیں اور ساتھ یہ بھی باور کروایا جائے کہ ہر نئے ماڈل، اسٹائل یا برانڈ کی چیزیں بلا ضرورت جمع کرنا فضول خرچی کے زُمرے میں آتا ہےاورایسی عادات اور شوق کبھی سُود مند ثابت نہیں ہوتے ۔
یاد رکھیے، قناعت سے بڑی دُنیا میں کوئی دولت نہیں ،جو کئی پریشانیوں، فکروں سے بے نیاز کرکے دِل کا غنی کر دیتی ہے۔پھر یہ ایک ایسا وصف ہے، جسے اپنا کر نہ صرف ہم خود مطمئن ہو جاتے ہیں، بلکہ ارد گرد کے لوگ بھی پُرسکون رہتے ہیں۔ یہ خُوبی بہت ہی کم لوگوں کو عطاہوتی ہے، وگر نہ اکثر لوگ تو خواہشات کے بھنور میں پھنس کر اَن گنت مسائل ہی کا شکار رہتے ہیں۔عام طور پر نمایش اور دکھاوے کا جذبہ خواتین میں زیادہ پایا جاتا ہے۔ وہی زیادہ تر الماریاں، درازیں بَھرنے اور پرس خالی کرنے میں مصروفِ عمل نظر آتی ہیں۔حالاں کہ یہ خود کو ایک ایسی مشقّت میں مبتلا کرنے والی بات ہے، جس کا کسی کو کوئی فائدہ نہیں ہوتا۔ یوں بھی بےجا اسراف ناحق غرور و تکّبر، حرص و ہوس اور لالچ و حسد جیسی اخلاقی بیماریوں میں مبتلا کرتا ہے۔ اگر کسی کی مہنگی سواری، بیش قیمت موبائل، قیمتی پوشاک یا دیگر چیزوں کی حرص میں آپ اپنی چادر سے زیادہ پاؤں پھیلاتے ہیں، تو پھر آپ خود اپنے ہاتھوں اپنے لیے مشکل کھڑی کرتے ہیں، ساتھ اپنے آس پاس کے لوگوں کو احساسِ کم تری میں مبتلا کرکے اُنہیں بھی اِسی راہ پر لگا رہے ہوتے ہیں۔
یاد رکھیں، ضرورت کے وقت سو روپے بھی اہمیت رکھتے ہیں اور بلاضرورت ہزاروں روپے خرچ کردینا کوئی معنی نہیں رکھتا۔ نعمت کا درست استعمال ہی اس کا شکرانہ ہوتا ہے، لہٰذا اپنی حیثیت اور طاقت کے مطابق خرچ کریں۔ کسی کو نیچا دکھانے یا خوامخواہ اترانے کے خبط سے خود کو بچائیں۔ جو میسّر ہے، اُس میں گزارہ کریں اور جو نعمتیں حاصل ہیں، ان کا شُکر ادا کریں۔ زیادہ سے زیادہ یا خُوب سے خُوب تر کے حصول کی سوچ اپنے ذہن سے کھرچ ڈالیے اور اپنی اولاد کو بھی اِسی کی ترغیب دیں، تاکہ بچپن ہی سے ان میں قناعت پیدا ہو اور وہ کبھی حرص و ہوس کی دوڑ میں شامل نہ ہوں۔
