قلم ہمارا ہتھیار

سرینگر// سرینگر //کانگریس کے سینئر لیڈر منی شنکر ایئر نے کہا کہ اُن کی سربراہی والا 6 رکنی سول سوسائٹی گروپ سرکاری دورے پر وادی کشمیر نہیں آیا ہے بلکہ یہاں سب کی رائے سننے کے غرض سے آیا ہوا ہے۔ انہوں نے کہا کہ اُن کے پاس سب سے بڑا ہتھیار ’قلم‘ ہے اور وہ نئی دہلی جاکر اپنے دورے کی رودات کو دستاویزی شکل دیں گے۔ منی شنکر ایئر نے نامہ نگاروں کے سوالات کا جواب دیتے ہوئے کہا ’یہ کوئی سرکاری وفد نہیں ہے۔ ہم یہاں سب کی رائے سننے کے لئے آئے ہوئے ہیں۔ ہم نے  میرواعظ کی بات سنی۔ ہم آگے بھی بہت سے لوگوں سے ملنے جارہے ہیں‘۔ انہوں نے کہا کہ وہ دورے کی رودات کو دستاویزی شکل دیں گے۔ انہوں نے کہا ’دورے کے اختتام پر ہم طے کریں گے کہ ہم اپنی طرف سے کیا کرسکتے ہیں۔ ہمارے پاس ایک ہتھیار قلم ہے۔ ہم دہلی جاکر لکھنا شروع کریں گے‘۔یہ پوچھے جانے پر کہ مرکز میں برسراقتدار بھارتیہ جنتا پارٹی نے سول سوسائٹی ممبران کے اس ’دورہ کشمیر‘ سے لاتعلقی کا اظہار کیا ہے، تو سینئر کانگریس لیڈر نے کہا ’ہم بی جے پی کی طرف سے نہیں آئے ہیں۔  غور طلب بات یہ ہے کہ اس سے قبل مزاحمتی جماعتوں نے گزشتہ برس ایجی ٹیشن کے دوران کل جماعتی پارلیمانی وفد سے ملاقات نہیں کی تھی،تاہم بعد مین سابق وزیر خارجہ اور بی جے پی رکن یشونت سنہا کی قیادت میں سیول سوسائٹی کی جو ٹیم کشمیر آئی،ان سے محمد یاسین ملک کے بغیر بیشتر مزاحمتی لیڈروں نے بات چیت کی۔