اشتیاق ملک
ڈوڈہ //ڈوڈہ ضلع کے قصبہ ٹھاٹھری میں آتشزدگی واردات میں ایک مکان خاکستر ہوا ہے۔ پیر کو دوپہر جامع مسجد ٹھاٹھری کے متصل عبدالرشید بٹ ولد صمدا بٹ ساکنہ جنگلواڑ کی چار منزلہ عمارت کی بالائی منزل میں آگ لگ گئی اور کچھ ہی لمحوں میں ساتھ والی عمارت میں پھیل گئی۔اس دوران مقامی لوگ ،پولیس و فائر بریگیڈ کی گاڑی و اہلکار موقع پر پہنچے اور بچاؤ کاروائی شروع کی. آتشزدگی سے اگر چہ کوئی جانی نقصان نہیں ہوا ہے تاہم انعام الحق بٹ نامی دوکاندار کا پینٹ سے بھرا اسٹور مکمل طور پر خاکستر ہوا وہیں محمد رمضان زرگر کے مکان کی بالائی منزل بھی تباہ ہوئیں.بتایا جاتا ہے کہ بجلی کی شارٹ سرکٹ کے باعث آگ لگ گئی. صدر بیوپار منڈل ٹھاٹھری پرویز احمد کچلو نے کشمیر عظمیٰ کو بتایا مقامی لوگوں ،پولیس و فائر بریگیڈ کی بروقت کارروائی سے ایک بڑا حادثہ ٹل گیا. انہوں نے کہا کہ قصبہ ٹھاٹھری میں پچھلے دو ماہ سے آتشزدگی کی متعدد وارداتیں پیش آئیں ہیں. انہوں نے انتظامیہ سے متاثرہ کنبوں کی معقول امداد فراہم کرنے کا مطالبہ کیا ہے. ادھر پولیس نے معاملہ درج کر کے مزید تحقیقات شروع کی ہے۔
