عظمیٰ نیوز سروس
سرینگر//عید الاضحیٰ کی آمد جیسے جیسے قریب آ رہی ہے ، وادی کشمیر کے مختلف علاقوں میں قائم مویشی منڈیوں میں خریداروں کا رش بڑھتا جا رہا ہے اور سب سے بڑی اور نمایاں منڈی اس وقت شہر سری نگر کے عیدگاہ علاقے میں نظر آتی ہے ، جہاں روزانہ ہزاروں لوگ قربانی کے جانوروں کی خریداری کے لیے جمع ہو رہے ہیں۔عید گاہ کی مویشی منڈی میں کشمیر کے مختلف اضلاع بشمول شوپیاں، پلوامہ، بانڈی پورہ، بارہمولہ اور کپواڑہ سے بیوپاری اپنے جانور لے کر پہنچے ہیں۔ بکرے ، بھیڑ اوربیل کی درجنوں اقسام یہاں فروخت کے لیے پیش کی گئی ہیں، جن کی قیمتیں جانوروں کی نسل، وزن اور صحت کے مطابق مختلف ہیں۔منڈی میں موجود خریداروں کا کہنا ہے کہ اس سال جانوروں کی قیمتوں میں گزشتہ برس کی نسبت خاطر خواہ اضافہ دیکھا جا رہا ہے ۔منظور احمد، جو اپنے بیٹے کے ہمراہ ایک بکرے کی خریداری کے لیے آیا تھا، نے بتایا:‘ہم ہر سال یہاں آتے ہیں، مگر اس بار بکروں کی قیمت 20 ہزار سے شروع ہو کر 50 ہزار تک جا رہی ہے ۔ پچھلے سال یہی جانور 10 سے 15 ہزار میں مل جاتا تھا۔’شوپیاں سے آئے ایک بیوپاری غلام نبی نے بتایا:‘ہم نے ان جانوروں کی پرورش پورے سال کی ہے ۔ چارے ، ویکسین، اور گاڑی کرایے پر لے کر یہاں تک لانا آسان کام نہیں ہے ۔’انتظامیہ کی جانب سے منڈی میں نظم و ضبط قائم رکھنے کے لیے خصوصی اقدامات کیے گئے ہیں۔ عید گاہ کے وسیع میدان کے باہر پولیس اہلکار تعینات کیے گئے ہیں تاکہ ٹریفک کو منظم رکھا جا سکے اور منڈی میں کسی بھی قسم کی بدنظمی سے بچا جا سکے ۔ بچوں میں خاصا جوش و خروش پایا جا رہا ہے ، جو اپنی پسند کے جانوروں کے ساتھ سیلفیاں لیتے نظر آتے ہیں۔
