عظمیٰ نیوز سروس
کولمبو// سری لنکا میں ایک فوجی ہیلی کاپٹر گر کر تباہ ہوگیا جس کے نتیجے میں 6 افراد ہلاک ہوگئے ۔ غیر ملکی میڈیا کے مطابق ہیلی کاپٹر ‘بیل 212’ میں کل 12 افراد سوار تھے اور ہیلی کاپٹر سری لنکا کے مادورو اویا کے آبی ذخائر میں گر کر تباہ ہوا۔ رپورٹ کے مطابق ہیلی کاپٹر میں سوار 6 افراد ہلاک ہوگئے جن میں سری لنکن اسپیشل فورسز اور ائیر فورس کے جوان شامل ہیں جب کہ 6 افراد زخمی ہوئے ہیں۔ ترجمان سری لنکن ائیرفورس نے بتایا کہ ہیلی کاپٹر پاسنگ آؤٹ پریڈ کی مشق کے لیے جارہا تھا کہ حادثہ پیش آیا۔رپورٹ کے مطابق سری لنکن حکام نے حادثے کی وجوہات کے بارے میں تاحال کچھ بتانے سے انکار کیا۔ادھر وسطی سے شمالی چلی جاتے ہوئے ایک چھوٹا ایمبولینس طیارے کا رابطہ جس میں چھ افراد سوار تھے ، منقطع ہو گیا اور اس کے حادثے کا شکار ہونے سے چھ افراد ہلاک ہو گئے ۔مقامی افسران نے جمعرات کو اس کی تصدیق کی۔میٹروپولیٹن ریجن کے صدارتی مندوب گونزالو دوران نے پریس کو بتایا ‘‘ہم ان چھ ہم وطنوں کے اہل خانہ، دوستوں اور سوگوار سبھی لوگوں کے تئیں تعزیت کا اظہار کرتے ہیں۔’’چلی کی فضائیہ نے کہا کہ طیارے کا ملبہ سینٹیاگو کے مضافات میں واقع شہر کوراکاوی سے ملا ہے ۔
