فوجی نظام عدلیہ میں شفافیت نہیں

نئی دہلی//بین الاقوامی بشری پاسداری کی تنظیم ایمنسٹی انٹرنیشنل نے کہا کہ مژھل جھڑپ میں فوجی اہلکاروں کی سزا معطل کرنے کے فیصلے نے فوجی نظام انصاف میں خامیوں کی واضح نشاندہی کی ہے۔ ایمنسٹی نے کہا ہے کہ ہندوستان کو چاہیے کہ وہ اس سلسلے میں سیول انتظامیہ کی طرف سے آزادنہ تحقیقات کرے۔ ایمنسٹی کے پروگرام ڈائریکٹر برائے ہند آسمتا باسو نے ایک بیان میں کہا” مژھل فرضی جھڑپ کیس میں پیش رفت نے ایک بار پھر یہ بات اجاگر کی کہ انسانی حقوق کی پامالیوں سے متعلق الزامات کی خفیہ فوجی عدالتی نظام کے بجائے سیول انتظامیہ کی طرف سے آزادانہ تحقیقات اور مقدمہ چلایا جانا چاہیے“۔انہوں نے کہا کہ سیول انتظامیہ کی طرف سے تحقیقات اور شنوایوں میں شفافیت اور آزادی ہوتی ہے،جو کہ فوجی عدلیہ نظام میں نظر نہیں آتا۔ایمنسٹی نے کہا کہ مژھل میں جاں بحق شہریوں کے کنبوں کو2010کے دوران سزاﺅں کے بارے میں کوئی بھی اطلاع نہیں دی گئی اور نہ ہی آج کہا گیا کہ مجرموں کی سزاﺅں کو معطل کیا گیا۔ آسمتا باسو نے کہا” فوج کا دعویٰ ہے کہ انسانی حقوق کی پامالیوں میں زیر ٹالرنس ہے،تاہم فوجی نظام عدلیہ کے طریقہ کار نے یہ ثابت کردیا کہ ان دعوﺅں میں حقائق نہیں ۔