۔ 1,614پولیس اہلکاروں نے دوران ڈیوٹی جانیں قربان کیں:ایل جی
سرینگر// لیفٹیننٹ گورنر منوج سنہا نے منگل کو کہا کہ پورے ملک نے مرکز کے زیر انتظام علاقے میں امن و سلامتی کو برقرار رکھنے میں جموں و کشمیر پولیس کی قابلیت اور غیر متزلزل عزم کو تسلیم کیا ہے۔وہ پولیس شہدا کو خراج عقیدت پیش کررہے تھے۔یوم پولیس یادگاری تقریب سے خطاب کرتے ہوئے،سنہا نے پولیس کی جانب سے دی گئی “بے پناہ” قربانیوں کی تعریف کی اور ان 1,614 اہلکاروں کو یاد کیا جنہوں نے ڈیوٹی کے دوران اپنی جانیں قربان کیں۔ انہوں نے کہا”ان کی قربانیوں کو پیسے سے برابر نہیں کیا جا سکتا،” بلکہ انتظامیہ اس بات کو یقینی بنائے گی کہ شہدا کے خاندانوں کو مشکلات کا سامنا نہ کرنا پڑے۔ایل جی سنہا نے کہا، “میں امن برقرار رکھنے کے لیے 24گھنٹیکام کرنے کے لیے تمام پولیس اہلکاروں کی تعریف کرتا ہوں،” ۔انہوں نے مزید کہا، “جے اینڈ کے پولیس متعدد محاذوں پر آپریشنز میں سب سے آگے رہی ہے۔”انہوں نے پولیس اہلکاروں کے غیرمعمولی عزم پر زور دیتے ہوئے کہا کہ بہت سے لوگوں کے پاس “کوئی چھٹیاں نہیں، کوئی تہوار نہیں ،ان کی ڈیوٹی صرف ان کا فرض ہے۔”ایل جی نے عوام اور سیکورٹی اداروں پر زور دیا کہ وہ ملی ٹینسی اور اس کے حامیوں کے خلاف چوکس رہیں۔
انہوں نے خطے کو محفوظ بنانے کے لیے اجتماعی عزم پر زور دیتے ہوئے کہا “گزشتہ پانچ سالوں کے دوران جموں و کشمیر کے لوگ ملی ٹینسی کے خلاف کھڑے ہوئے ہیں، ہمیں اس بات کو یقینی بنانا ہے کہ ملی ٹینٹ اور ان کے حامی اپنے مذموم عزائم میں کامیاب نہ ہوں” ۔سنہا نے اس بات پر زور دیا کہ امن و قانون کی فضا مضبوط رکھنے کے لیے اجتماعی عزم اور سماجی تعاون ناگزیر ہے ۔ انہوں نے کہا کہ ہر شہری کو یہ عہد کرنا چاہیے کہ وہ پولیس اور انتظامیہ کے ساتھ مل کر جموں و کشمیر کو محفوظ اور پرامن خطہ بنانے میں اپنا کردار ادا کرے ۔ لیفٹیننٹ گورنر نے ملک میں عدالتی نظام میں کی گئی اصلاحات کا بھی ذکر کیا۔ انہوں نے کہا کہ بھارت نے اب نوآبادیاتی دور کے پرانے قوانین سے آگے بڑھتے ہوئے تین نئے فوجداری انصاف قوانین متعارف کرائے ہیں جو سزا نہیں بلکہ انصاف پر توجہ دیتے ہیں۔سنہا نے کہا کہ جدید دور میں غلط معلومات اور جعلی بیانیہ سب سے بڑا چیلنج بن چکا ہے ، جس کا مقابلہ کرنے کے لیے پولیس اور دیگر اداروں کو اسمارٹ ٹیکنالوجی استعمال کرنی ہوگی۔ ان کے بقول، ہمیں ان عناصر کے خلاف سائنسی اور تکنیکی بنیادوں پر کارروائی کرنی ہوگی جو جھوٹے بیانیے کے ذریعے سماجی ہم آہنگی کو نقصان پہنچانا چاہتے ہیں۔لیفٹیننٹ گورنر منوج سنہا نے پولیس اہلکاروں، شہداء کے اہل خانہ اور حاضرین سے اپیل کی کہ وہ وطن کی سالمیت، جموں و کشمیر کی سلامتی اور امن کے استحکام کے لیے متحد ہو کر کام کریں۔ انہوں نے کہا کہ حکومت شہداء کے اہل خانہ کو درپیش کسی بھی قسم کی مشکلات کے ازالے کے لیے پرعزم ہے تاکہ ان کے ایثار کو ہمیشہ زندہ رکھا جا سکے ۔
