فرائض کی ادائیگی سے ہی ملک خوشحال :یوگی

لکھنو//لکھنوکے ودھان بھون میں نوجوانوں پر مبنی ایک تاریخی تقریب منعقد ہوئی۔ وزیر اعلیٰ یوگی آدتیہ ناتھ نے حکومت ہند کی وزارت برائے امور نوجوانان اور کھیل کے زیراہتمام منعقدہ وکست بھارت یووا سنسد مہوتسو میں مہمان خصوصی کے طور پر اجتماع سے خطاب کیا۔ودھان سبھا سکریٹریٹ میں خطاب کرتے ہوئے وزیر اعلیٰ نے وزیر اعظم نریندر مودی کی طرف سے متاثر ایک پہل، میرا یووا بھارت (ایم وائی بھارت)ابھیان کے تحت نوجوانوں کی قیادت کو فروغ دینے کے عزم کا اعادہ کیا۔ انہوں نے اس بات پر زور دیا کہ یوتھ پارلیمنٹ کا مقصد محض سیاسی رہنما پیدا کرنا نہیں ہے بلکہ نوجوانوں کے ذہنوں میں قائدانہ خوبیاں پیدا کرنا ہے، جس سے وہ مختلف شعبوں یعنی مقننہ، ایگزیکٹو، عدلیہ، کاروبار یا کسی اور شعبے میں معاشرے کے لیے اپنا کردار ادا کر سکیں‘‘۔وزیراعلیٰ نے مختلف اضلاع سے آئے نوجوان شرکا کا خیر مقدم کیا اور ان کی موجودگی کو فخر کا لمحہ قرار دیا۔ انہوں نے روشنی ڈالی کہ 240نوجوانوں کو ملک کی سب سے بڑی مقننہ کے اندر مباحثوں میں حصہ لینے کے لیے منتخب کیا گیا ہے۔انہوں نے یہ بھی نوٹ کیا کہ وزیر اعظم مودی کی رہنمائی میں 2019میں شروع کی گئی یوتھ پارلیمنٹ کی پہل زندگی کے تمام شعبوں میں قیادت کو فروغ دینے کے لیے آگے بڑھ رہی ہے۔انہوں نے کہا’’مقننہ پالیسیاں بناتی ہے، ایگزیکٹو ان پر عمل درآمد کرتی ہے، اور عدلیہ قوانین کی تشریح کرتی ہے۔ دونوں مل کر اچھی حکمرانی کو یقینی بناتے ہیں‘‘۔