عظمیٰ نیوزڈیسک
نئی دہلی// دہلی کے نظام الدین علاقے میں جمعہ کو ایک بڑا حادثہ پیش آیا۔ ہمایوں کے مقبرے کے پیچھے واقع فتح شاہ کی درگاہ کی چھت اور دیوار کا ایک حصہ اچانک گر گیا۔ حادثے کے وقت درگاہ کے اندر کئی لوگ موجود تھے جو ملبے تلے دب گئے۔ اس المناک حادثے میں چھ افراد جاں بحق ہو گئے۔اس واقعہ کے سلسلے میں نامعلوم افراد کے خلاف تعزیرات ہند (بی این ایس) کی دفعہ 106، 125 اور 290 کے تحت ایف آئی آر درج کی گئی ہے۔ مقدمہ درج کر کے تفتیش شروع کر دی گئی ہے۔ملبے تلے دبے تمام لوگوں کو بچا لیا گیا ہے۔ ریسکیو آپریشن مکمل کر لیا گیا ہے۔ جوائنٹ سی پی سنجے جین نے بتایا کہ درگاہ شریف پتے شاہ کمپلیکس کی چھت گر گئی جس کے بعد 10 لوگوں کو بچا کر ایمس ٹراما سینٹر اور ایل این جے پی بھیجا گیا، معلومات کے مطابق ملبے سے 11 لوگوں کو بچا لیا گیا ہے۔ اطلاع ملنے پر پولیس اور فائر بریگیڈ کی ٹیم موقع پر پہنچ گئی۔ تمام افراد کو ملبے سے نکالنے کے بعد ریسکیو آپریشن روک دیا گیا ہے۔بتایا جا رہا ہے کہ یہ درگاہ نظام الدین علاقے میں ہمایوں کے مقبرے کے پیچھے واقع ہے۔ شام کے وقت اچانک چھت کی دیوار گر گئی جس کی وجہ سے ایک درجن کے قریب لوگ پھنس گئے اور وہاں چیخ و پکار افرا تفری کا ماحول پیدا ہو گیا۔ پولیس انتظامیہ اور فائر بریگیڈ کو فوری طلب کیا گیا۔ کچھ ہی دیر میں فائر بریگیڈ نے موقع پر پہنچ کر امدادی کارروائی شروع کر دی۔ فائر بریگیڈ کے ملازمین کی ٹیم نے فوری طور پر ملبہ ہٹایا اور لوگوں کو علاج کے لیے اسپتال پہنچایا۔
