سر ی نگر//لیفٹیننٹ گورنر کے مشیر فاروق خان نے یہاں صوبائی کمشنر کشمیر کے دفتر میں اِنتظامیہ کے مختلف محکموں کی سرمائی تیاریوں کے اِنتظامات کا جائزہ لینے کے لئے ایک میٹنگ کی صدارت کی۔مشیر فاروق خان نے محکمہ وار ایکشن پلان اور سرمائی تیاریوں کے لئے جموں وکشمیر اِنتظامیہ کی طرف سے کئے گئے اِنتظامات کا جائزہ لیا۔اُنہوں نے متعلقہ اَفسران پر زور دیا کہ وہ تمام محکموں کے ساتھ مربوط انداز میں موسم سرما کی مختلف سرگرمیوں کے لئے منصوبہ بندی کر کے کام کریں۔اُنہوں نے متعلقہ اَفسران کو ضروری اِنتظامات پہلے سے کرنے کو کہا۔ مشیر موصوف نے موسمیات کے حوالے سے ڈائریکٹر میٹرولوجیکل ڈیپارٹمنٹ کو ہدایت دی کہ وہ 10سے 15 دِن ، ایک ہفتہ اور 24 گھنٹے پہلے میڈیا کو متعلق بلیٹن جاری کریں۔ اُنہوں نے موسم کی پیش گوئی کے نظام اور آئی ایم ڈی کے بلیٹن کی تکمیل کرتے ہوئے کہا کہ پیشگی جاری کردہ موسمی ایڈوائزریز موسم کی خرابیوں کے دوران بہترین ممکنہ اِنتظامات کی منصوبہ بندی میں مدد کرتی ہے جس سے عوام الناس کے لئے ضروری خدمات میں رُکاوٹوں کو کم کرنے میں بھی مدد ملتی ہے۔لیفٹیننٹ گورنر کے مشیر فاروق خان نے صوبہ کشمیرکے تمام ضلع ترقیاتی کمشنران کو کنٹرول روم کا ایک مضبوط میکانزم بنانے کی بھی ہدایت دی تاکہ لوگوں کے مسائل کا کم سے کم وقت میںازالہ کیاجاسکے۔مشیر موصوف نے پاور ڈیولپمنٹ ڈیپارٹمنٹ کی تیاریوں کا جائزہ لیتے ہوئے صوبہ کشمیرکے شہری ، دیہی اور دور دراز علاقوں میں ٹرانسفارمروں کی تبدیلی کے لئے مخصوص ٹائم لائنز طے کیں۔اُنہوں نے متعلقہ اَفسران سے کہا کہ سخت سردی کے موسم میں لوگوں کو زیادہ سے زیادہ ریلیف فراہم کرنے کے لئے تمام محاذوں پر بہتری لانے کی بھرپور کوشش کریں۔اُنہوں نے ٹرانسفارمروں ، کھمبوں ، الیکٹرک سپلائی لائنوں کے بفر سٹاک کے بارے میں بھی جانکاری حاصل کی اور تمام اَضلاع میں بفر سٹاک کو ان اَضلاع کو ترجیح دینے کے ساتھ منطقی طور پر ترتیب دینے کے بارے میں بھی دریافت کیاجہاں بھاری برف باری ہوتی ہے۔مشیر فاروق خان نے محکمہ پی ڈبلیو ڈی کی تیاریوں کا جائزہ لیتے ہوئے سڑک کے بلا تعطل رابطے اور مناسب ٹریفک اِنتظام کو یقینی بنانے پر زور دیا۔اُنہوں نے متعلقہ اَفراد کو نیشنل ہائی ویز ، ہسپتالوں اور تمام اہم جگہوں پر برف ہٹانے والی مشینری اور آلات کومہیارکھنے کی ہدایت دی۔مشیر موصوف کو سرمائی موسم میں صحت شعبے کا جائزہ لیتے ہوئے جانکاری دی گئی کہ تمام طبی سامان جیسے ادویات ، آکسیجن اور دیگر طبی آلات وافر مقدار میں موجود ہیں جس میں کنٹرول روم پہلے سے قائم ہے۔مشیر موصوف نے ان علاقوں میں ڈاکٹروں اور طبی سامان کی دستیابی کی ہدایت دی جو شدید برفباری کے دوران سب سے زیادہ متاثر ہوتے ہیں۔لیفٹیننٹ گورنر کے مشیر فاروق خان نے ڈائریکٹر خوراک ، شہری رسدات اور امورِ صارفین کشمیر سے کہا کہ وہ ضروری اشیاء بشمول راشن ، رسوئی گیس، ایندھن اور تیل خاکی کا وافر ذخیرہ رکھیں۔اِسی طرح جل شکتی محکمہ ، سری نگر میونسپل کارپوریشن ، بارڈر روڈ س آرگنائزیشن کو ہدایت دی گئی کہ وہ خراب موسمی حالات سے نمٹنے کے لئے اَفرادی قوت اور مشینرکو تیار کریں۔
فاروق خان کی تمام محکموں کو ہدایت
