فاروق اندرابی کا شہر سرینگر کا شبانہ دورہ

سرینگر//شہر سرینگر میں سٹریٹ لائیٹوں کے کام کاج او ربجلی سپلائی کی دستیابی کا جائزہ لینے کے غرض سے حج و اوقاف ، صحت عامہ اور بجلی کے وزیر مملکت سید فاروق احمد اندرابی نے گزشتہ شب شہر کے مختلف علاقوں کا تفصیلی دورہ کیا۔ چیف انجینئر بجلی ، سپر انٹنڈنگ انجینئر بجلی اور دیگر سینئر افسران کے ہمراہ وزیر نے جواہر نگر، آبی نو پورہ ،خانیار ، رعناواری ، سعدہ کدل ، نگین ،حضرتبل ، کنہ تار ، لعل بازار ، جڈی بل ، نوشہرہ ، صورہ ، عیدگاہ ، جامع مسجد ، نوہٹہ ، مہاراج گنج ، زینہ کدل ،عالی کدل ،خانقاہ معلی ،نواب بازار ، کاک سرائے،کرن نگر، فتح کدل ، بابا ڈیمب اور خیام چوک کا دورہ کیا۔ دورکے دوران وزیر نے متعلقہ علاقہ جات میں ذاتی طور سٹریٹ لائیٹوں کے کام کاج کا جائزہ لیتے ہوئے متعلقہ افسران کو خراب بڑی لائیٹوں کو فوری طور بحال کرنے کے احکامات دئیے۔ انہوں نے پرانی لائیٹوں کو ایل ای ڈی لائیٹوں سے تبدیل کرنے کی بھی ہدایات دیں۔وزیر کو بتایا گیا کہ محکمہ اعلیٰ معیاری ایل ای ڈی لائیٹیں نصب کرنے میں لگا ہوا ہے اور شہر کے مختلف مقامات پر پہلے ہی مذکورہ لائیٹوں کو نصب کیا گیا ہے۔وزیر نے کئی مقامات پر مقامی افراد سے بات کر کے سٹریٹ لائیٹوں کے کام کاج کے بارے میں جانکاری حاصل کی۔ انہوں نے افسران کو تمام لائیٹوں کو قابل کار بنانے اور مساجد اور زیارت گاہوں کے نزدیک نصب لائیٹوں کوقابل کار بنانے کے احکامات دئیے۔انہوں نے افسران کو محکمہ سیاحت او رشہری ترقیات کے ساتھ تال میل بنائے رکھنے کی ہدایت دی۔اس کے علاوہ انہوں نے باقی ماندہ علاقوںمیں سٹریٹ لائیٹیں نصب کرنے کے لئے کہا۔وزیر نے کہا کہ 2014ء کے سیلاب کے بعد بجلی کے بنیادی ڈھانچے کو ہوئے نقصان کو ٹھیک کرنا وزیر اعلیٰ محبوبہ مفتی کا عزم تھا ۔انہوںنے کہا کہ موجودہ مخلوط سرکار نے حکومت سنبھالنے کے بعد مذکورہ شعبے کی بہتری کے لئے کافی کام کیا البتہ گزشتہ سال کے حالات کی وجہ سے کام میں خلل پڑا ۔ انہو ںنے کہا کہ محکمہ عوام کو 24گھنٹے بلا خلل بجلی سپلائی فراہم کرنے کے لئے کار بند ہے۔انہوں نے کہا کہ سرکار نے ریاست کی مجموعی ترقی کے لئے کئی پروجیکٹ شروع کئے ہیں اور زمینی سطح پر مثبت بدلائو نظر آرہا ہے۔وزیر نے کہا کہ سرینگر ایک بین الاقوامی سیاحتی مقام ہونے پر سرکار کی ذمہ داری ہے کہ وہ اسے جدید خطوط پر استوار کرے ۔ اسلئے کئی پروجیکٹوں کو عملایا جارہا ہے تاکہ سیاح بڑی تعدا د میں شہر کا دورہ کرسکیں۔وزیر نے محکمہ کے افسران کو عوام کو بہتر خدمات دستیاب رکھنے کے لئے دلی کوششیں کرنے کے لئے کہا۔انہو ںنے کہا کہ محکمہ بجلی ایک اہم محکمہ ہے اور لوگوں کو مذکورہ محکمہ سے کافی توقعات ہیں۔