فائر بندی کی پاسداری، چین کا اظہار اطمینان

 بیجنگ // چین نے ہندوستان او رپاکستان کی جانب سے 2003 سیز فائر معاہدے کی تابعداری کرنے کو خوش آئندہ قرار دیتے ہوئے اس اُمید کا اظہار کیا ہے کہ دونوں ممالک باہمی تنازعات کو احسن طور پر حل کریں گے۔ بدھ کو دونوں ممالک کے ڈی جی ایم اوز کی جانب سے باہمی طور پر 2003سیز فائر معاہدے کی پاسداری کرنے کے عمل پر چین نے خوشی کاا ظہار کرتے ہوئے دونوں ممالک کی کوششوں کو سراہا ہے۔ دفتر خارجہ کے ترجمان ہوا چنیونگ نے میڈیا سے بات کرتے ہوئے کہا کہ ’ ہم پاکستان اور ہندوستان کی جانب سے گزشتہ روز 2003میں طے پاچکے سیز فائر معاہدے کی پاسداری کرنے کے عمل کو سراہتے ہیں‘۔ دفتر خارجہ کے ترجمان نے بتایا کہ ’ ہم اُمید رکھتے ہیں کہ دونوں ممالک باہمی تنازعات کو افہام و تفہیم اور بات چیت کے ذریعے حل کریں گے اور اس طرح خطہ میں امن کی فضا کو پروان چڑھانے میں اپنا کردار ادا کریں گے‘۔