یو این آئی
غزہ //اسرائیلی فوج نے غزہ پر بمباری کا سلسلہ مزید تیز کردیا، تازہ حملوں میں فلسطینی پناہ گزینوں کو خوراک فراہم کرنے والے ٹرکوں کو بھی نشانہ بنایا جا رہا ہے۔عالمی خبر رساں ادارے کے مطابق غزہ میں اسرائیلی فوج کے فضائی حملے میں فلسطینی پناہ گزینوں کو خوراک کی فراہمی پر مامور 9 امدادی کارکن ہلاک ہوگئے۔غزہ میں ہی اسرائیلی فوج نے ایک کثیر المنزلہ رہائشی عمارت پر بمباری کی جس کے نتیجے میں 20 فلسطینی ہلاک ہوگئے جن میں خواتین اور بچے بھی شامل ہیں۔اسی طرح غزہ کے ایک اور مقام پر بھی اسرائیلی بمباری میں مزید 4 فلسطینی ہلاک ہوگئے۔ مجموعی طور پر 33 فلسطینی ہلاک اور 40 سے زائد زخمی ہیں۔زخمیوں میں زیادہ تر بچے ہیں جنھیں مختلف اسپتالوں میں طبی امداد فراہم کی جا رہی ہے۔ 7 زخمی بچوں کی حالت نازک بتائی جا رہی ہے۔واضح رہے کہ غزہ پر گزشتہ برس 7 اکتوبر سے جاری اسرائیلی بمباری میں ہلاک ہونے والے فلسطینیوں کی تعداد 45 ہزار کے قریب ہے جب کہ ایک لاکھ 6 ہزار سے زائد زخمی ہیں۔12 لاکھ سے زائد فلسطینی بے گھر ہیں۔دوسری جانب نومنتخب امریکی صدر ڈونلڈ ٹرمپ نے مشرق وسطیٰ کا تنازع حل کرنے کا وعدہ کرتے ہوئے کہا کہ اسرائیلی وزیراعظم نیتن یاہو جانتے ہیں، نئی امریکی انتظامیہ جنگ کا خاتمہ چاہتی ہے ۔
