یو این آئی
غزہ //اسرائیلی طیاروں کی غزہ کے رہائشی علاقوں پر بمباری سے 24 گھنٹوں کے دوران مزید 75 سے زیادہ فلسطینی ہلاک ہوگئے۔ بین الاقوامی میڈیا کے مطابق اسرائیلی فوج کی جانب سیغزہ شہر، خان یونس، رفح اور دیر البلح پر کی گئی بمباری کے نتیجے میں مزید 75 سے زائد فلسطینی ہلاک اور 315 افراد زخمی ہوئے ہیں۔غیر ملکی میڈیا کے مطابق صیہونی فوج کی بمباری کے نتیجے میں ہلاک ہونے والے افراد کی لاشیں ملبے تلے سے نکالنے کا عمل تاحال جاری ہے۔فلسطینی وزارت صحت نے بتایا کہ غزہ میں 18 مارچ سے دوبارہ شروع ہونے والے اسرائیلی حملوں کے نتیجے میں ہلاک ہونے والوں کی تعداد 5,000 سے تجاوز کر گئی ہے۔غزہ کی وزارتِ صحت کے مطابق جنگ بندی کے خاتمے کے بعد سے اب تک 16,000 سے زائد فلسطینی زخمی ہو چکے ہیں۔7 اکتوبر 2023 کے بعد سے اسرائیلی حملوں میں اب تک جاں بحق فلسطینیوں کی مجموعی تعداد 55 ہزار 400 سے تجاوز کر گئی ہے جن میں بچوں اور خواتین کی بڑی تعداد شامل ہیں۔حکومتی میڈیا دفتر کے مطابق 7 اکتوبر 2023 سے صیہونی فوج کی بمباری میں اب تک شہید فلسطینیوں کی مجموعی تعداد 69,000 سے تجاوز کر چکی ہے، ملبے تلے دبے ہزاروں افراد کو مردہ قرار دیا جا رہا ہے۔
