یواین آئی
غزہ//اسرائیلی فوج نے رات گئے غزہ کے 2ہسپتالوں اور ایک پناہ گزین کیمپ پر حملے کرکے مزید 8فلسطینیوں کوجاں بحق کردیا۔ ایک روز میں 22فلسطینی جانوں سے ہاتھ دھو بیٹھے۔ عالمی ادارہ صحت کے سربراہ میں شمالی غزہ کے کمال عدوان ہسپتال کے اطراف فوری جنگ بندی کا مطالبہ کردیا۔ غزہ سٹی کے نواحی علاقے دراج میں اسرائیلی فضائیہ اسکول میں قائم پناہ گزینیوں کے کیمپ پر اسرائیلی بمباری کے نتیجے میں 8 فلسطینی جاں بحق ہوگئے، اس سے پہلے کئے گئے حملوں میں 14فلسطینی جاں بحق ہوگئے تھے۔اسرائیلی طیاروں نے ہفتے کو نصیرت کیمپ اور دیرالبلاح پر بمباری کی، اسرائیلی فوج کے حملوں میں خاتون 3 بیٹیوں کے ساتھ جان گنوا بیٹھی۔دریں اثنا، اسرائیلی فوج نے کمال عدوان ہسپتال سے عملے اور شہریوں کو انخلا کا حکم جاری کرنے کے بعد حملہ کردیا، کمال عدوان ہسپتال کے ڈائریکٹر حسام ابو صفیہ نے ایک ویڈیو پیغام جاری کیا ہے جس میں انہوں نے کہا ہے کہ ہسپتال پر ایک غیر معمولی حملہ کیا گیا ہے۔ انہوں نے کہا کہ اسرائیلی فوج نے بغیر کسی پیشگی انتباہ کے کمال عدوان ہسپتال کو مختلف قسم کے ہتھیاروں سے نشانہ بنایا ہے، ہم پر براہ راست حملہ کیا جا رہا ہے، آئی سی یو یونٹ کے ساتھ ساتھ زچگی اور نرسنگ کے شعبوں کو بھی نشانہ بنایا جا رہا ہے۔انہوں نے کہا کہ ٹینکوں اور کواڈ کاپٹروں سے بم باری کی جا رہی ہے جس میں براہ راست ہمیں نشانہ بنایا جا رہا ہے جبکہ ہم ہسپتال کے اندر موجود ہیں، ہم نہیں جانتے کہ اس گھڑی میں ہمیں کیوں نشانہ بنایا جا رہا ہے۔انہوں نے کہاکہ ہمیں مطلع کیا گیا ہے کہ اگلے چند گھنٹوں میں ہسپتال کو خالی کرا لیا جائے گا، یہ تباہ کن ہے کیونکہ ہم یہاں شمال میں خدمات فراہم کرنے والے واحد ہسپتال ہیں۔اسرائیلی افواج نے شمالی غزہ کے علاقے جبالیہ میں واقع العودہ ہسپتال پر بھی فائرنگ کی ہے، یہ حملہ ایک ایسے وقت میں کیا گیا ہے کہ جب قریبی علاقے بیت لاہیا میں کمل عدوان ہسپتال پر حملہ کیا جارہا تھا۔ ہسپتال پر اسرائیلی فوج کی جانب سے فائرنگ اور گولہ باری کی گئی اور وارڈز کو نشانہ بنایا گیا ہے۔
اسرائیلی بمباری جنگ نہیں ظلم ہے: پوپ فرانسس
یواین آئی
واٹیکن سٹی//عیسائیوں کے روحانی پیشوا پوپ فرانسس نے غزہ میں اسرائیلی بمباری کو جنگ نہیں ظلم قرار دے دیا۔غیرملکی میڈیا کے مطابق غزہ میں اسرائیلی بمباری کے نتیجے میں جمعے کو ایک ہی خاندان کے 7بچوں سمیت 10 افراد جاں بحق بن گئے ۔اس حوالے سے ایک موقع پر گفتگو کرتے ہوئے پوپ فرانسس نے کہا کہ بچوں پر بمباری کی گئی، یہ ظلم ہے، یہ جنگ نہیں ہے۔دوسری جانب اسرائیل نے پوپ فرانسس کے اس بیان کو نشانے پر رکھ لیا اور ان پر دہرے معیار کا الزام عائد کردیا۔اسرائیلی وزارت خارجہ کی جانب سے جاری بیان میں کہا گیا ہے کہ پوپ فرانسس کا بیان مایوس کن ہے کیونکہ اس کا سچ سے تعلق نہیں، وہ اسرائیلی جنگ سے واقف نہیں۔اسرائیلی وزارت خارجہ نے غزہ میں اپنی جارحیت کا دفاع کرتے ہوئے کہا کہ بدقسمتی سے پوپ فرانسس نے ان سب کو نظر انداز کرنے کا انتخاب کیا ہے۔
