رحیم رہبر
یونیورسٹی میں تاجہ کو “Queen of Beauty” کا خطاب ملا تھا۔ وہ حیاء کے لباس میں ملبوس ایک پری تھی۔ اس کو دیکھ کر زمانے کے سارے غم بھول جاتے تھے۔ تاجہ کا باپ ایک سید ھا سادہ زمیندار تھا۔ اُس کی ماں زیبہ ایک سرکاری سکول میں خاکروب کا کام کرتی تھی۔ تاجہ اپنے والدین کی اکلوتی اولاد تھی۔ اللہ نے اُسے بے انتہا خوبیوں سے نوازا تھا۔
گریجویشن مکمل کرنے کے بعد اُس نے یونیورسٹی کے شعبہ ٔ اردو میں داخلہ لیا۔ اس کی ایک وجہ شاید یہ تھی کہ تاجہ کو شعر گوئی کے ساتھ لگائو تھا۔ تاجہ کو میرؔ کی شاعری نے بے حد متاثر کیا تھا۔ دیوانِ میر تقی میرؔ ہمیشہ اُس کے بیگ میں ہوا کرتا تھا۔ اس کی آواز بہت ہی سُریلی تھی۔ ڈبیٹ ہو یا سمینار یا کوئی ادبی مجلس تاجہ ضرور حاضرین و ناظرین کو اپنے کلام سے محظوظ کرتی تھی۔
اُس دن جب کلاس رُوم میں تاجہ نے پروفیسر احمد سے پوچھا تھا۔
’’سر ! غزل سے کیا مراد ہے؟‘‘
’’تم جیسی!‘‘ پروفیسر احمد نے دفعتاً جواب دیا۔
’’مطلب!؟‘‘ تاجہ نے تعجب سے پوچھا
’’جی! جو میں کہہ رہا ہوں! تم جیسی بحروا وزان، ردیف قافیہ، تغزل اور موسیقیت سے لبریز۔ تمہارے نازک بدن کا ہر ایک عضو غزل کا ایک ایک شعر ہے!‘‘۔
جواب سُن کر تاجہ پسینوں میں نہا گئی۔ الفاظ اُس کے رسیلے ہونٹوں پر بکھر کر رہ گئے۔ اُس کے پاس کہنے کے لئے بہت کچھ تھا پر پرفیسر احمد کے جواب نے اس کو سکتے میں ڈال دیا۔
ادبیات کا پیریڈ ختم ہوتے ہی تاجہ بہت ہی انہماک سے کلاس رُوم سے نکل گئی۔ اس کی کربناک حالت کو دیکھ کر میں تاجہ کو تلاشنے کے لئے کینٹین گیا۔ تاجہ وہاں نہیں ملی۔ میں نے لائبریری میں تاجہ کو ڈھونڈا ، وہ وہاں بھی نہیں تھی۔ میں نے لان میں تاجہ کو تلاشا لیکن تاجہ کہیں نہیں ملی۔ آخر کار میں زنانہ ہوسٹل میں تاجہ سے ملنے کے لئے گیا۔ تاجہ نے ہوسٹل کے کمرے کو اندر سے کنڈی کی تھی!
میں نے دروازہ کھٹکھٹایا لیکن دروازہ نہیں کُھلا۔ میں نے کچھ لڑکوں کو فون پر بلایا۔ ہم نے کمرے کا دروزہ توڑا۔۔۔۔!
میرے پائوں تلے زمین کھسک گئی جب میں نے تاجہ کو اپنے بیڈBedپر بے ہوش پایا! میں نے فوراً ڈاکٹر کو کال کی۔۔۔!
جواں مرگ تاجہ کی کربناک خبر آناً فاناً روشنی کی طرح یونیورسٹی کیمپس میں پھیل گئی۔ پروفیسر احمد کی آنکھوں میں سے اشکوں کی برسات ہورہی تھی۔ اُس نے تھرتھراتے ہاتھوں سے تاجہ کے چہرے سے نقاب سرکا یا۔ اُس کی زبان سے بے اختیار نکل گیا۔
’’آج میرؔ کی غزل خاموش ہوگئی!‘‘۔
���
شہید آزاد کالونی، پیٹھ کانہ ہامہ ماگام بیروہ بڈگام
موبائل نمبر؛9906534724
