رنگ چہرے پر کئی آنے لگے جانے لگے
جانے کیا یاد آ گیا ان کو کہ شرمانے لگے
ہم سہارے کی انہیں کیسے نہ کرتے پیشکش
وہ حیا سے یا ادا سے ایسے بل کھانے لگے
جانے کیوں یکلخت اس نے یوں نگاہیں پھیر لیں
ہم اچانک بھیڑ میں تنہا نظر آنے لگے
راستہ اپنا نظر آیا نہیں دن میں جنہیں
رات آئی تو ہمیں ہی راہ دکھلانے لگے
میرے بارے میں کئی لوگوں نے جو کچھ بھی کہا
وہ کہ تعریفیں ہیں یا الزام، افسانے لگے
ہو گئے بلراج ہم ان کے حوالے ایک دن
وار کرنے والے اتنے جانے پہچانے لگے
بلراجؔ بخشی
۱۳/۳، عید گاہ روڈ ، آدرش کالونی، اُدہم پور- ۱۸۲۱۰۱(جموں کشمیر) Mob: 09419339303
email: [email protected]
بزم میں آئے ذکر یار کے ساتھ
جام لائے ہیں ہم خمار کے ساتھ
تھی رقیبوں سے بز م میں رونق
پھول برسے تھے خار خار کے ساتھ
ہیں میسر سکون کے لمحے
کھیلنا بھی ہے انتشار کے ساتھ
سانپ چپکا ہے صندل سے
کوئی لپٹا ہے اقتدار کے ساتھ
ایک شعلہ تھا میرے پہلو میں
کس نے دیکھا ہے خاکسار کے ساتھ
عام لوگوں کا حال کیا ہوگا
ہوگیا ہے د ھوکہ شہر یار کے ساتھ
بہہ رہا ہے یہاں لہو عادلؔ
ایک مدت سے آ بشار کے ساتھ
اشرف عادلؔ
کشمیر یونیورسٹی،حضرت بل سرینگر
موبائل:9906540315
قطرہ قطرہ تیری آنکھوں سے نکلتے رہنا
ہم چراغوں کا مقدر ہے کہ جلتے رہنا
منزلِ عشق فقیروں کو ملا کرتی ہے
ہم سے دیوانوں کا تو بس کام ہے چلتے رہنا
باغباں تو نے کہاں سے یہ ڈھب سیکھ لیا
اپنے پیروں تلے کلیوں کو مسلتے رہنا
موجِ دریا تو مسافر سے اْلجھتی کیا ہے
ہم نے سیکھا ہے چٹانوں سے سنبھلتے رہنا
آج شعلوں نے جو گھیرا ہے تو یاد آیا ہے
آگ کی لو پہ پتنگوں کا مچلتے رہنا
سرد موسم میں بھی ناسور پنپتے دیکھے
موسمِ گْل میں بھی زخموں کا اْبلتے رہنا
جانِ جاویدؔ جو مل جائے تو کہنا اب بھی
ہم نے چھوڑا نہیں نیزوں پہ اْچھلتے رہنا
سردار جاویدؔ خان
رابطہ؛ مینڈھر،پونچھ،9697440404
گلشن پہ مہربان یہ موسم نہیں ہوا
پھولوں کے ساتھ جو ہوا کچھ کم نہیں ہوا
آدم کی خطا اب تلک تڑپاتی ہے اسے
ابلیس اپنے جرم پہ برہم نہیں ہوا
لاکر حصارِ ذات میں قیدی بنا دیا
خلدِ بریں میں مطمئن آدم نہیں ہوا
موجود ہی نہیں ہے دل سینے میں اس لئے
بربادیٔ چمن سے کوئی غم نہیں ہوا
ہے محوِ آرائش کوئی جلوہ گر سدا
جو کائنات میں ہوا یک دم نہیں ہوا
فطرت کے اصولوں سے وہ مجبور تھا شاید
جو آشنا تو تھا مگر محرم نہیں ہوا
دانشؔ عجیب اس کا ہے انداز گفتگو
اُس نے بہت کہا مگر برہم نہیں ہوا
سید وقار دانشؔ
گورنمٹ ڈگری کالج کنگن
رابطہ نمبر؛7298762449
