وہ پیکرِ جمال لبِ بام نہ آیا
جیسے اُفق پہ چاند سرِ شام نہ آیا
ہم نے تو اُن پہ جان دی نکلے جو بے وفا
کم بخت عشق بھی ہمارے کام نہ آیا
سب رند پی کے بزم میں سرمست ہوگئے
ہم ہیں کہ جن کے ہاتھ کبھی جام نہ آیا
آتش زنی و کُشت و خوں، عصمت دری ہوئی
لیکن کسی پہ کوئی بھی الزام نہ آیا
مال اور جان و آبرو سب کچھ ہوا تباہ
لینے کو اس کا کوئی انتقام نہ آیا
ہیں بیچ کھاتے قوم کو غدار ہر طرح
کیا وقت اِن کو بخشتا انعام نہ آیا
پامال کس قدر ہیں اب انسان کے حقوق
دنیائے دوں کا اس پہ کچھ اقدام نہ آیا
ہر سو ہو قہر و ظلم تورومانس کیا کریں
اس کُشت و خوں میں عشق کسی کام نہ آیا
باطل یہ کُشت و خوں کرے کھائے شکست حق
الہام کبھی لے کے یہ پیغام نہ آیا
ہوتا خفا ہی اس پہ یہ جہاں ہے اے بشیرؔ
بن کر جو اِس کا بندئہ بے دام نہ آیا
بشیر احمد بشیرؔ (ابن نشاط) کشتواڑی
کشتواڑ،موبائل نمبر؛7006606571
آج عقبیٰ میں خدا سے کہہ رہی ہیں بیٹیاں
آدمی حیوان ہیں بس جانور اچھا لگا
کب ملے الفاظ کس کے جذبۂ دل کو یہاں
لوگ جھوٹے ہیں کہاں یہ سوچ کر اچھا لگا
ایک ہی پل میں کیا اُس کو ہوا نے سرنگوں
وادیٔ گلپوش کا جو بھی شجر اچھا لگا
کب تلک رہتا سلامت غمگساری کا بھرم
دوستوں کا گھر بسانا چاند پر اچھا لگا
کس قدر آغوش میں اپنے چھپایا ہے اُسے
آہ! اس بھوکی زمیں کو جو گُہر اچھا لگا
پھر رہاہوں دربدر گاہے اِدھر گاہے اُدھر
کر گئی دیوانگی مجھ پہ اثر اچھا لگا
فن نکھرتا ہے میرا راحتؔ تیری تنقید سے
داد مت دینا مجھے تم کو اگر اچھا لگا
رئوف راحتؔ
سرینگر، موبائل نمبر؛9419626800
عشق میں ایک کام ہوتا ہے
صرف جینا حرام ہوتا ہے
گھر کا رہتا ہے اور نہ گھاٹ کا وہ
کام اس کا تمام ہوتا ہے
جو بھی کرتا ہے اپنی لو میرج
جورو کا وہ غلام ہوتا ہے
آنکھوں آنکھوں میں عشق ہوتا تھا
اب تو سیدھے کلام ہوتا ہے
جتنا بدنام دنیا کرتی ہے
اتنا ہی اپنا نام ہوتا ہے
چوٹ کھاتے ہیں عشق میں جو لوگ
ان کے ہاتھوں میں جام ہوتا ہے
عشق کرنا رضیؔ عبادت ہے
سب سے مشکل یہ کام ہوتا ہے
ڈاکٹر رضیؔ امروہوی
آباد مارکیٹ دودھ پور علی گڑھ
موبائل؛9897601669
منظر حیات سوزی کا دیکھا نہ جائے گا
ہم سے تو گھر میں چین سے بیٹھا نہ جائے گا
کٹ جائے سر بھلا سے جھکایا نہ جائے گا
ظالم کو بے گناہ تو لکھا نہ جائے گا
طوفان سر اُٹھائے کہ بجلی کوئی گِرے
گُل کی ہنسی، کلی کا چٹخنا نہ جائے گا
مقتل سجائو تم کہ صلیبیں کھڑی کرو
یہ انقلابِ وقت ہے روکا نہ جائے گا
اچھا ہُوا کہ فکر نشیمن سے بچ گئے
احسان بجلیوں کا بُھلایا نہ جائے گا
اب بے قراریوں ہی سے شاید سکوں ملے
آسودگی میں دِل کا تڑپنا نہ جائے گا
دل کی جہاں ہے قدر نہ قیمت ضمیر کی
اُس انجمن میںہم سے تو جایا نہ جائے گا
کرنا ہے تشنگی کا مدا و اہمیں وحیدؔ
چل کرکسی کے پاس تو دریا نہ جائے گا
وحید مسافر
باغات کنی پورہ،موبائل نمبر؛9419064259
مسافرت کی کتاب لکھتا
ترے سخن کا جواب لکھتا
اگر یہ میرے ہی ہاتھ ہوتا
تو سب کی خاطر ثواب لکھتا
مجھے اگر لکھنا پڑھنا آتا
میں ایک چھوٹا نصاب لکھتا
جو دیکھے ہیں زندگی نے اب تک
وہ سارے کے سارے خواب لکھتا
کئے ہیں بےحد گناہ میں نے
میں خود ہی خود کو عذاب لکھتا
میں عشق کا ساز سنتا ہر دن
میں اپنے حق میں رباب لکھتا
نہیں کسی اور کو میں لکھتا
میں جتنا خود کو خراب لکھتا
کوئی تو ان کا پتہ بتا دے
میں ان کے خط کا جواب لکھتا
ہو یار تم کتنے خوبصورت
میں حسن لے کر شباب لکھتا
کرم جو تم نے کئے ہیں بسملؔ
اسی کا بس میں حساب لکھتا
سید بسمل مرتضٰی
شانگس اننت ناگ کشمیر
طالب علم :ڈگری کالج اترسو شانگس
9596411285
ہاتھوں میں اس کے سارا یہ عالم تو گیر تھا
پھر بھی غمِ زمان و مکاں میں اسیر تھا
اک شہرِ طلسمات سے گُزرا میں رات بھر
سُلطانِ عصر بھی تو وہاں پر حقیر تھا
یہ کون نا مُراد ہے زمیں پہ تیغ زن
تخلیق جو کیا تھا وہ روشن ضمیر تھا
لو آ ج دیکھ خون کی ندیاں ہیں بہہ رہی
کل تک یہ چارسو ہی تِرا بے نظیر تھا
اک عشق ہی ہے جو ترا ابرِ مطیر ہے
اک عشق ہی تھا جو ترا ابرِ مطیر تھا
اک عقل تھی کہ راستہ واجدؔ بُھلا دیا
اک دل یہ ہم نوا تھا، اکیلا مُشیر تھا
واجدؔ عباس
نوگام سوناواری، بانڈی پورہ
فون نمبر : 7006566516
عاشقوں کو حسرتِ دیدار تک پہنچا دیا
اہلِ دل کو جرأتِ اظہار تک پہنچا دیا
پوچھ لیتے کیوں غلطی ہم سے یہ سرزد ہوئی
آپ نے تو کیفرِکردار تک پہنچا دیا
سوچتا ہوں کیسے شکوہ میں کروں جلاد سے
اپنی حق طلبی نے مجھ کو دار تک پہنچا دیا
کب تلک رکھتے تھے پنہاں داستانِ دل حضور
جو فسانے تھے انہیں سرکار تک پہنچا دیا
پھر سرِ ساحل وہ اپنے منتظرہی رہ گئے
جن کو آنا تھا انہیں منجدھار تک پہنچا دیا
عقیل فاروق
طالبِ علم:- شعبہ اْردو کشمیر یونیورسٹی
موبائیل نمبر:-8491994633
