اب تو حصار ذات سے یہ آگہی نکال
مستی بھری حیات سے کچھ بیخودی نکال
رشتوں کا عکس سنگ ہوا کچھ تو غور کر
اب دل کے آئینے سے یہ بے چہرگی نکال
اب تیرگی میں ڈوب چکا ہے دلِ حزیں
اس عالمِ سیاہ سے کچھ روشنی نکال
رادھا نکل ہی آئے گی موہن کو ڈھونڈنے
کوئی سریلا گیت بھی گا، بانسری نکال
پتھر میں ڈھل نہ جائے کہیں میرا یہ وجود
اس کی نگاہِ شوق سے اب ساحری نکال
بکھری ہوئی حیات ہے کلیات میر ؔکی
اوراقِ شاعری سے کبھی زندگی نکال
ہر زخم آفتاب کی مانند کر طلوع
عادلؔ زمینِ شعر سے ہی چاندنی نکال
اشرف عادل ؔ
کشمیر یونیورسٹی ،حضرت بل سرینگر کشمیر
رابطہ؛ 9906540315
کہیں بھی زندگی اپنی گزار سکتا تھا
وہ چاہتا تو میں دانستہ ہار سکتا تھا
زمین پاؤں سے میرے لپٹ گئی ورنہ
میں آسمان سے تارے اُتار سکتا تھا
مرے مکان میں دیوار ہے نہ دروازہ
مجھے تو کوئی بھی گھر سے پکار سکتا تھا
جلا رہی ہیں جسے تیز دھوپ کی نظریں
وہ اُبر باغ کی قسمت سنوار سکتا تھا
پُر اطمینان تھیںاس کی رفاقتیں بلراجؔ
وہ آئینے میں مجھے بھی اُتار سکتا تھا
بلراجؔ بخشی
۱۳/۳، عید گاہ روڈ ، آدرش کالونی
اُدہم پور- ۱۸۲۱۰۱(جموں کشمیر)
موبائل نمبر؛ 09419339303
گماں ہوں یا یقیں ہوں میں
میں ہوں بھی یا نہیں ہوں میں
یہ دنیا عارضی ہے گر
کہاں کا پھر مکیں ہوں میں
جسے تم سے محبت تھی
نہیں وہ میں نہیں ہوں میں
رہن رہتی ہے جو ہردم
کسانوں کی زمیں ہوں میں
جہاں چھوڑا تھا تم نے ہاتھ
سنو اب بھی وہیں ہوں میں
مجھے رب نے بنایا ہے
بڑا ہی دلنشیں ہوں میں
پرویز انیس
کامٹی، ناگپور (مہاراشٹر)
موبائل۔9049548326
ذرا سی بھی نہ ہم سے ہو سکے گی
جہاں داری نہ ہم سے ہو سکے گی
محبت تم سے پھر کر لینگے، پر اب
وہ پہلی سی نہ ہم سے ہو سکے گی
وطن کو بیچ دیں دولت کی خاطر
یہ مکاری نہ ہم سے ہو سکے گی
ذرا سی آشنائی کر تو لیں گے
مگر یاری نہ ہم سے ہو سکے گی
ہوّس کو عاشقی کا نام دیں ہم
یہ بے شرمی نہ ہم سے ہو سکے گی
زباں پر آئے گی بس بات دل کی
ریاکاری نہ ہم سے ہو سکے گی
فہیم اقبال
ہلر شاہ آباد،ڈورو اننت ناگ
موبائل نمبر؛7006402556
اس طرح مجھ کو ستا کے کیا ملا
دل کی دنیا کو جلا کے کیا ملا
سر بھی پھوڑا تیرے کوچے میں کبھی
خون میں اپنے نہا کے کیا ملا
جام الفت کا دیا تھا گر مجھے
زہرِ غم اس میں ملا کے کیا ملا
تیرے سنگِ در پہ آ کے بارہا
مجھ کو اپنا سر جھکا کے کیا ملا
یاد کر کر کے تجھے شام و سحر
اشک آنکھوں سے بہا کے کیا ملا
رات بھر اب جاگتا ہوں درد سے
زخمِ فرقت دل پہ کھا کے کیا ملا
بُجھ کے جو خاموش تھی، شادابؔ وہ
شمع، ہائے! پھر جلا کے کیا ملا
محمد شفیع شادابؔ
شالیمارسرینگر کشمیر
رابطہ؛9797103435
زندگی اتنی مہرباں ہے کیا؟
یہ جو سر پر ہے آسماں ہے کیا؟
میں اکیلا سفر میں بہتر ہوں
لٹُ رہا ہے جو کارواں ہے کیا؟
بے اثر کیوں ہیں شیخ کی باتیں
ذہن میں کوئی کہکشاں ہے کیا؟
بس لیا جائے چین سے جس میں
اس ہے بہتر کوئی جہاں ہے کیا؟
بولتا بھی نہیں میرے حق میں
شہر کا شہر بے زُباں ہے کیا؟
جعفر تابش
مغلمیدان کشتواڑ،موبائل نمبر؛8492956626
ایسی ہو راہ پھول کا رستہ کہیں جسے
ایسی زمیں ہو خلد کا خطّہ کہیں جسے
خوں میں بھی انشعاب سی تاثیر چاہئے
قطرہ عمیق اتنا ہو دریا کہیں جسے
بندش،خیال،لفظ گری،قافیہ ردیف
بامِ غزل کے واسطے زینہ کہیں جسے
میدانِ خواہشات میں اپنے نفوس کو
تم اس طرح ہرائو کہ ہارا کہیں جسے
بحرِ رواں کے مثل تو اشکِ رواں بھی ہے
پر حق تمہارا آنکھ ہے گہرا کہیں جسے
ان آئینوں میں ہم نہیں تصویر دیکھتے
اہلِ دہر امیر کا چہرہ کہیں جسے
ماں اک چراغ ہے جو جلے روشنی بھی دے
’’ایسا کہاں سے لائوں کہ تجھ سا کہیں جسے‘‘
حاصل ہوا ہے ذات کا عرفان ؔتب کہا
وہ خاک ہوں میں ، آپ بھی سونا کہیں جسے
عرفان عابدی مانٹوی
غازیپور-یوپی
موبائل نمبر؛989100798147
یادِ سرکار میں جو اشک بہاتے ہوں گے
دل کی اجڑی ہوئی بستی کو بساتے ہوں گے
ان کی محفل جو یہاں خوب سجاتے ہوں گے
شہرِ طیبہ سے بُلاوے انھیں آتے ہوں گے
ان کی آنکھوں کی چمک دیکھنے والی ہو گی
سُرمہءِ خاکِ مدینہ جو لگاتے ہوں گے
اہل ِ ایمان جو سوتے ہیں سدا پڑھ کے درود
اس کے صدقے میں وہ دیدار کراتے ہوں گے
آپ کے نام پہ کٹ مرتے ہیں کاشفؔ جو لوگ
جام کوثر کا انہیں آپ پلاتے ہوں گے
اظفر کاشفؔ پوکھریروی
متعلم.. MANUU بی ایڈ کالج بڈگام
موبائل نمبر؛9149833563
آئے تھے ہاے! کس لئے ہم اس جہان میں
ہم نے تو عمر کاٹ دی اس امتحان میں
کچھ صبروشکر بھی ہو ذرا اطمینان ہو
’’عجلت سے کب ملے گی مسرت جہان میں‘‘
تم نے تو زندگی کو مزے سے جیا مگر
ہم اب بھی جی رہے ہیں خوشی کے گمان میں
گلشن کے پھول سارے ہی مسلے گئے میرے
کچھ بھی نہیں رہا ہے میرے گلستان میں
دیوار و در نہ کوئی نہ ہو اہلِ خانہ بھی
رہنے لگے ہیں ہم بھی کچھ ایسے مکان میں
باتوں پہ میری تیش کیوں آیا انہیں عقیلؔ
کوئی نہ کوئی نقص ہے میری زبان میں
عقیلؔ فاروق
طالب علم شعبہ اردو کشمیر یونیورسٹی
موبائل نمبر؛8491994633
آنکھوں میں دریا رکھا ہے
دل مثلِ صحرا رکھا ہے
تیری گواہی سے کیا ہوگا
فیصلہ تو لکھا رکھا ہے
کیسے سنور کر آئے ہو تم
آئینہ تنہا رکھا ہے
خوابوں میں ہی ماں آجائے
میں نے گھر کُھلا رکھا ہے
لشکر کے تو میں ہوں مقابل
خود کو پر تنہا رکھا ہے
خود کو تم آزاد تو کردو
بندھن میں اب کیا رکھا ہے
راقمؔ حیدر
شالیمار سرینگر، کشمیر،9906543569
کرکے وعدے توڑے تم نے
رشتے سارے توڑے تم نے
وقت پہ تیری بولی بدلی
ارمان میرے توڑے تم نے
دشمن داری کیا ہے مجھ سے
گھر کے شیشے توڑے تم نے
کیسے کہا تھا میری خاطر؟
چاند ستارے توڑے تم نے
غور کرو کچھ منتظرؔ تم
کیونکر ناطے توڑے تم نے
منتظرؔ یاسر
فرصل کولگام کشمیر
موبائل نمبر؛ 9682649522
وعدوں کو کبھی ایسے بُھلایا نہیں کرتے
اپنوں کو سرِراہ ستایانہیں کرتے
گھیرا ہو جسے آگ کی لپٹوں نے ہر اک سمت
اُس گھر میں چراغوں کوجلایا نہیں کرتے
جو جی رہا ہو زندگی آہوں کے سہارے
اچھا یہی ہے اس کو ستایا نہیں کرتے
چاہا ہو تمہیں جس نے اپنی جان سے بڑھکر
اس کی وفا کو یوں ٹھکرایا نہیں کرتے
آنکھیں کھلی رکھی ہو جس نے انتظار میں
چہرے سے کفن اس کے ہٹایا نہیں کرتے
ہر جرمِ وفا کے لیے تادیب ہے منظور
غیروں کو مگر بات بتایا نہیں کرتے
جو چل دیا منجدھار میں یوں چھوڑ کر شاہین ؔ
بے سود ہے، ایسوں کو بـلایا نہیں کرتے
شاہینہ یوسفـ
ریسیرچ اسکالر سینٹرل یونیور سٹی آف کشمیر
فون نمبرـ؛9469447331
آئے ہو یاد تم مجھے پہلی بار کی طرح
چشمِ یار کی طرح، صبحِ دار کی طرح
وہ کرم کے چار دن یہ ستم کی زندگی
چبھ رہے ہیں بار بار ہائے خار کی طرح
بس تمہاری یاد ہے اور ہوتا روگ کیا
سردیوں کی رات ہے رُت بہار کی طرح
کچھ مداوا عشق کا ڈھونڈ لو اے دوستو
موت مانگیں بار بار ہم بیمار کی طرح
ایک اُس کے یار تھے اور اُن کی داستاں
ایک میں خاموش تھا گنہگار کی طرح
شہزادہ فیصل منظور خان
طالبِ علم،گورنمنٹ میڈیکل کالج سرینگر
موبائل نمبر؛8492838989
