عظمیٰ نیوز سروس
بانہال//نیشنل کانفرنس سنیئر لیڈر اور ضلع صدر رام بن نے جموں وکشمیر انتظامیہ سے اپیل کرتے ہوئے کہاکہ عید الاضحی کے م قعہ پر ضلع رام بن میں خاص طور پر بانہال اور گول میں لوگوں کو اشیائے ضروریہ کی مناسب فراہمی کو یقینی بنایا جائے ۔انہوں نے کہا کہ دور دراز کے علاقوں میں رہنے والے لوگوں کو راشن کی قلت کا سامنا ہے اور بانہال، رام بن، گول اور بٹوٹ کے کئی گاؤں جن میں سنگلدان، کھاری، تریگام، مہو مانگیت، نیل، راج گڑھ، کنگا، ہاروگ، گگرناگ، پوگل، مالیگام شامل ہیں،میں بار بار بجلی کی کٹوتی اور پینے کے پانی کی کمی کی شکایت موصول ہورہی ہے جس کی وجہ سے عام لوگوں کو شدید مشکلات درپیش ہیں ۔انہوں نے انتظامیہ سے اپیل کی کہ وہ ضلع کے تمام گاؤں بالخصوص بانہال کے دور دراز علاقوں میں لوگوں کو بجلی اور پینے کے پانی کی بلا تعطل فراہمی کو یقینی بنائے۔انہوں نے زور دیا کہ ضلعی انتظامیہ اشیائے ضروریہ کی فراہمی پر مکمل نظر رکھے اور اس بات کو یقینی بنائے کہ لوگوں کو راشن، چینی، مٹی کے تیل، کھانا پکانے کی گیس اور دیگر اشیائے ضروریہ کی وجہ سے پریشانی کا سامنا نہ کرنا پڑے۔ موصوف نے انتظامیہ اور محکمہ خوراک و سپلائیز پر بھی زور دیا کہ وہ اشیائے ضروریہ کی مارکیٹ کی قیمتوں کو کنٹرول کرنے اور قیمتوں کو کنٹرول میں رکھنے کے لئے موثر اقدامات کریں۔
