عظمیٰ نیوزسروس
جموں// وزیربرائے جل شکتی، جنگلات و ماحولیات اور قبائلی امور جاوید احمد رانانے سول سیکرٹریٹ جموں میں ایک اعلیٰ سطحی میٹنگ کی صدارت کی تاکہ آنے والی عید الاضحی کی تقریبات کی تیاریوں کا جائزہ لیا جاسکے۔میٹنگ میں وزیر برائے خوراک ، شہری رسدات و اَمورِ صارفین اور ٹرانسپورٹ ستیش شرما اور وزیر اعلیٰ کے مشیر ناصر اَسلم وانی نے بھی شرکت کی۔اِس کے علاوہ ایڈیشنل چیف سیکرٹری جل شکتی شالین کابرا، پرنسپل سیکرٹری زراعت شیلندر کمار، کمشنر سیکرٹری مکانات و شہرترقی محکمہ مندیپ کور، سیکرٹری صحت سیّد عابد رشید شاہ، صوبائی کمشنر جموں، ضلع ترقیاتی کمشنر وں، محکموں کے سربراہان اور دیگر اعلیٰ افسران نے بھی میٹنگ میں حصہ لیا۔میٹنگ میں قربانی کے جانوروں کے اِنتظامات، عوامی تحفظ، ٹریفک مینجمنٹ، صحت سہولیات، مارکیٹ چیکنگ، مویشیوں کی قیمتوں کا تعین، پانی و بجلی کی فراہمی اور صفائی ستھرائی جیسے اَمور پر تفصیل سے بات چیت ہوئی۔جاویداحمد رانانے متعلقہ محکموں کو ہدایت دی کہ عید کے پُرامن اور اَحسن انعقاد کو یقینی بنانے کے لئے تمام ضروری اِنتظامات مکمل کئے جائیں۔ اُنہوں نے تقریبات کے دوران اَمن و امان کی صورتِ حال کو برقرار رکھنے اور سیکورٹی اِداروں کو چوکس رہنے کی ہدایت دی۔اَوقاف حکام کو ہدایت دی گئی کہ وہ اوقاف کمیٹیوں کے ذریعے نماز عید کے اَوقات کا اعلان بروقت کریں اور اس کی معلومات اِنتظامیہ، پولیس، سیکورٹی ایجنسیوں اور عوام تک پہنچائیں تاکہ وہ اَپنی منصوبہ بندی عین مطابق کر سکیں۔وزیر موصوف نے زور دیا کہ تمام اشیائے ضروریہ تمام جگہوں پر حکومت کے مقررکردہ نرخوں پر دستیاب ہوں اور اِس مقصد کے لئے مشترکہ ٹیمیں تشکیل دے کر مارکیٹ چیکنگ کی جائے تاکہ زیادہ قیمتوں اور ناقص اشیأکی شکایات دور کی جا سکیں۔اُنہوں نے کہا کہ مویشیوں کے نرخوں کو فلائنگ سکارڈز کے ذریعے طے اور جانچ کی جانی چاہیے تاکہ شکایات کو وقت پر اَزالہ کیا جا سکے۔وزیر جاوید احمد رانانے عیدالاضحی کی تقریبات کے دوران پانی اور بجلی کی فراہمی کو یقینی بنائیں۔ اُنہوں نے بالخصوص عیدگاہوں، مساجد اور دیگر اِجتماعاتی مقامات پر پینے کے پانی کی فراہمی کو یقینی بنانے کی ہدایت دی اور کہا کہ پیر پنجال، سانبہ، کٹھوعہ اور دیگر علاقوں میں ضرورت کے مطابق پانی کے ٹینکر تعینات کئے جائیں۔اُنہوں نے متعلقہ محکموں کو صفائی ستھرائی اور سڑکوں کی مرمت پر بھی زور دیا بالخصوص وہ راستے جو عیدگاہوں کی طرف جاتے ہیں۔وزیر موصوف نے ٹریفک کے مؤثر اِنتظام کی ضرورت پر بھی زور دیا اوراُنہوں نے ٹریفک پولیس کو ٹریفک کی روانی کو منظم کرنے، متبادل راستوں اور پارکنگ کا مناسب اِنتظامات کرنے کی ہدایت دی۔اُنہوں نے محکمہ صحت کو ہدایت دی کہ عید الاضحی کے دوران مناسب طبی سہولیات اور ایمرجنسی سروسز کی فراہمی کویقینی بنایا جائے۔وزیرجاوید احمد رانا نے تمام محکموں کے درمیان باہمی تال میل کی اہمیت پر زور دیا تاکہ عید کی تقریبات کا خوش اسلوبی سے اِنعقاد ہو۔ اُنہوں نے ضلع ترقیاتی کمشنروںکو ہدایت دی کہ وہ خود ان تیاریوں کی نگرانی کریں اور تمام ضروری اَقدامات کو بروئے کار لائیں۔میٹنگ میں فیصلہ کیا گیا کہ ہر ضلع میں کنٹرول روم قائم کئے جائیں تاکہ تقریبات کی نگرانی کی جا سکے اور کسی بھی قسم کے مسائل کو بروقت نمٹا جا سکے۔جاوید احمد رانا نے متعلقہ محکموں کو ہدایت دی کہ عید کے دوران ہائی الرٹ رہیں اور عوامی تحفظ اور صفائی کے تمام اَقدامات یقینی بنائیں۔ اُنہوں نے میونسپل کارپوریشن کو شہر کی صفائی ستھرائی کے لئے مؤثر اَقدامات اُٹھانے کی ہدایت دی۔میٹنگ کو بتایا گیا کہ حکومت نے قربانی کے جانوروں کے فضلے کو ٹھکانے لگانے اور صفائی ستھرائی کو یقینی بنانے کے لئے خاطر خواہ اِنتظامات کئے ہیں۔میٹنگ اِس عزم کے ساتھ اِختتام پذیر ہوئی کہ عیدالاضحی کی تقریبات پُرامن اور خوشگوار ماحول میں منعقدکی جائیں۔
ڈوڈہ انتظامیہ نے عیدالاضحی کے انتظامات کو حتمی شکل دے دی
عظمیٰ نیوزسروس
ڈوڈہ// عیدالاضحیٰ کے انتظامات کا منی کانفرنس ہال، ڈی سی آفس کمپلیکس ڈوڈہ میں ایڈیشنل ڈپٹی کمشنر انیل کمار ٹھاکر کی صدارت میں منعقدہ اسٹیک ہولڈر محکموں کی میٹنگ میں جائزہ لیا گیا اور اسے حتمی شکل دی گئی۔اجلاس میں ایکشن پلان اور مختلف محکموں کو سونپے گئے کاموں پر تبادلہ خیال کیا گیا۔ پولیس، ٹریفک پولیس، میونسپل باڈیز، حیوانات اور بھیڑ پالنے کے محکمے، جے پی ڈی سی ایل، جل شکتی، فوڈ سول سپلائیز اور کنزیومر افیئرز کے افسران نے اپنے اپنے محکموں کے ذریعے کیے گئے انتظامات کے بارے میں اپ ڈیٹس دیں۔اے ڈی سی نے مساجد، عید گاہوں اور مذبح خانوں کے ارد گرد صفائی کے انتظامات، پینے کے صاف پانی کی دستیابی، گلیوں اور بازاروں میں لائٹنگ اور مجموعی سکیورٹی کا جائزہ لیا۔ انہوں نے میونسپل حکام کو صفائی ٹیمیں تعینات کرنے اور اسٹریٹ لائٹس کے فعال ہونے کو یقینی بنانے کی ہدایت کی۔محکمہ حیوانات و بھیڑ ہزبنڈری کو ہدایت کی گئی کہ وہ قربانی کے جانوروں کی صحت کی جانچ کریں تاکہ بیماریوں کے پھیلاؤ کو روکا جا سکے۔ محکمہ صحت کو بڑے اجتماعی علاقوں کے قریب طبی امدادی کیمپ لگانے اور ہنگامی خدمات کو اسٹینڈ بائی رکھنے کو کہا گیا۔اے ڈی سی نے اشیائے ضروریہ کی دستیابی اور قیمتوں پر نظر رکھنے کے لیے خصوصی مارکیٹ انسپکشن ٹیمیں تشکیل دینے کی بھی ہدایت کی۔ محکمہ خوراک، شہری سپلائیز اینڈ کنزیومر افیئرز کو ضروری اشیاء کا مناسب ذخیرہ رکھنے اور بلیک مارکیٹنگ یا ذخیرہ اندوزی کو روکنے کا کام سونپا گیا تھا۔فائر اینڈ ایمرجنسی سروسز ڈیپارٹمنٹ کو اہم مقامات پر فائر ٹینڈر لگانے کی ہدایت دی گئی۔ پی ڈبلیو ڈی (آر اینڈ بی)، جل شکتی اور جے پی ڈی سی ایل جیسے محکموں کو تہوار کے دنوں میں سڑکوں، پانی کی پائپ لائنوں اور بجلی کی تقسیم کے نیٹ ورک کو برقرار رکھنے کے لیے اقدامات کرنے کی ہدایت دی گئی۔اے ڈی سی انیل کمار ٹھاکر نے ایک محفوظ اور پرمسرت جشن عیدالاضحیٰ کے لیے فرقہ وارانہ ہم آہنگی کو برقرار رکھنے، فیلڈ سطح کی نگرانی اور قریبی بین محکمہ جاتی رابطہ کاری کی اہمیت پر زور دیا۔
ڈی سی کشتواڑ نے عیدالاضحی کے انتظامات کا جائزہ لیا
عظمیٰ نیوزسروس
کشتواڑ// ڈپٹی کمشنر راجیش کمار شاون نے عیدالاضحیٰ کے لیے ضروری انتظامات کا جائزہ لینے اور اسے حتمی شکل دینے کے لیے ایک میٹنگ کی صدارت کی۔اجلاس میں سکیورٹی، ٹرانسپورٹ، صفائی، پانی اور بجلی کی بلاتعطل فراہمی، اشیائے ضروریہ کی دستیابی، صحت اور دیگر متعلقہ سہولیات جیسے انتظامات پر تفصیلی گفتگو ہوئی۔ڈی سی نے ریونیو، میونسپل کونسل، ایف سی ایس اینڈ سی اے، فوڈ سیفٹی، پولیس اور لیگل میٹرولوجی کی مشترکہ ٹیمیں تشکیل دینے کو کہا تاکہ معیاری مٹن، چکن، سبزیاں، پھل، بیکری اور کنفیکشنری وغیرہ کی مناسب دستیابی کو یقینی بنایا جا سکے۔لوگوں کی پریشانی سے پاک نقل و حرکت کو یقینی بنانے کے لیے محکمہ ٹرانسپورٹ کو ہدایت دی گئی کہ وہ تہوار کے دنوں میں تمام راستوں پر مناسب ٹرانسپورٹ خدمات فراہم کریں۔میونسپل حکام کو ہدایت کی گئی کہ وہ مقامی کمیٹیوں کی مشاورت سے مساجد اور عید گاہوں کے ارد گرد صفائی کے مناسب اقدامات کریں۔ محکمہ صحت کو ہدایت کی گئی کہ عیدالاضحی کے موقع پر تمام مذہبی مقامات پر جہاں پر اہم اجتماعات ہونے ہیں طبی اور پیرا میڈیکل سٹاف کے ساتھ ایمبولینسز بھی دستیاب رکھیں۔
