سرینگر//شہری ہلاکتوں کے خلاف12 اپریل کو ہڑتال،بلیک آوٹ اور احتجاج کرنے کا اعلان کرتے ہوئے مشترکہ مزاحمتی قیادت نے عندیہ دیا کہ وہ ذہنی طور پر ایجی ٹیشن کیلئے تیار رہیں۔ اس دوران ہلاکتوں اور آصفہ کے ساتھ یکجہتی کے طور پر مزاحمتی قیادت کے جلوس کی لالچوک پیش قدمی کو روکتے ہوئے پولیس نے محمد یاسین ملک کو حراست میں لیا،جبکہ حریت کانفرنس کے دونوں دھڑوں کے چیئرمینوں سید علی گیلانی اور میرواعظ عمر فاروق خانہ نظر بند رہے۔
سید علی گیلانی
کولگام کے کھڈونی علاقے میں شہری ہلاکتوں پر افسوس کا اظہار کرتے ہوئے سید علی گیلانی نے کہا کہ سیول آبادی کو نشانہ بنا کر ان نوجوانوں کو جاں بحق کیا گیا۔سرینگر کے آبی گزر میں احتجاجی جلوس سے ٹیلی فونک خطاب کرتے ہوئے انہوں نے کہا’’کشمیر کو قتل گاہ میں تبدیل کیا گیا ہے،اور نوجوانوں کو منصوبہ بند طریقے سے مارا جا رہا ہے‘‘۔بزرگ لیڈر نے کہا کہ ابھی شوپیاں کا واقعہ تازہ ہی تھا،کہ کولگام میں ایک مرتبہ پھر ان زخموں کو کریدا گیا۔ انہوں نے بین الاقوامی برداری سے مطالبہ کیا کہ بھارت کو’دہشت گرد ملک قرار دیا جائے۔سید علی گیلانی نے کہا’’کشمیر میں بھارت جنگی جرائم میں ملوث ہیں،اور انہیں کالے قوانین کی وجہ سے استثنیٰ بھی حاصل ہے،اس لئے اس ملک کو دہشت گرد ملک قرار دیا جانا چاہے‘‘۔
میرواعظ عمر فاروق
میرواعظ عمر فاروق نے کھڈونی کی زمین کو لالہ زار بنانے کی مذمت کرتے ہوئے کہا کہ ایک حکمت عملی کے تحت کشمیری عوام کو پشت از دیوار کیا جا رہا ہے۔ٹیلی فونک خطاب کرتے ہوئے میر واعظ نے کہا کہ وادی میں خوف و ہراس کا ماحول پیدا کیا جا رہا ہے،جبکہ جنوبی کشمیر کو خصوصی طور پر نشانہ بنایا جا رہا ہے۔انہوں نے کہا’’ شوپیاں میں شہری ہلاکتوں کا واقعہ ابھی تازہ ہی تھا کہ کولگام میں تباہی مچا دی گئی،اور چھوٹے بچوں کو بھی بخشا نہیں گیا‘‘۔انہوں نے الزام عائد کرتے ہوئے کہا کہ دانستہ طور پر وادی میں حالات کو مخدوش بنایا جا رہا ہے،تاکہ نوجوانوں کا قتل عام کیا جاسکے۔میر واعظ نے کہا ’’آپریشن آل آوٹ کی آڑ میں آپریشن وائپ آوٹ’( آپریشن صفایا) کیا جا رہا ہے۔انہوں نے کہا’’عوام ذہنی طور پر سڑکوں پر آنے کیلئے تیار رہیں،اس معاملے میں مشترکہ مزاحمتی قیادت میں مشاورت ہو رہی ہے۔محمد یاسین ملک احتجاجی جلوس سے خطاب کرتے ہوئے محمد یاسین ملک نے شہری ہلاکتوں کی مذمت کرتے ہوئے کہا کہ ایک منصوبے کے تحت کشمیر میں نسل کشی ہو رہی ہے۔انہوں نے اس موقعہ پر شہری ہلاکتوں کے خلاف مشترکہ مزاحمتی قیادت کے پروگرام کا اعلان کرتے ہوئے کہا کہ12اپریل جمعرات کو مکمل کشمیر بندکیا جائے گا۔محمد یاسین ملک نے شام کے وقت گھروں اور دیگر جگہوں پر روشنی گل کر کے’’بلیک آوٹ‘‘ کی کال بھی دی۔انہوں نے کہا کہ جمعرات کو ہی نماز ظہر کے بعد احتجاجی مظاہرے کئے جائیں۔ملک نے کہا’’ہلاکتوں کے خلاف لوگ اپنے اپنے علاقوں میں جمع ہو اور پرامن دھرنا دیکر احتجاج بھی کریں۔
