عظمیٰ نیوز سروس
سرینگر// اپنی پارٹی سربراہ سید الطاف بخاری نے بڈگام اسمبلی حلقہ کے لوگوں پر زور دیا کہ وہ ضمنی انتخابات میں اپنی پارٹی کے امیدوار مختار احمد ڈار کو اپنا تعاون دیکر کامیاب بنائیں۔انہوں نے ہمہامہ میں پارٹی کنونشن سے خطاب کرتے ہوئے لوگوں کو یاد دلایا کہ روایتی جماعتوں کے قائدین عوام کے پاس صرف اس وقت آتے ہیں جب انہیں ان کے ووٹ کی ضرورت ہوتی ہے۔انہوں نے کہاکہ جب 5 اگست 2019 کو جموں و کشمیر کی 200 سالہ پرانی ریاست ختم کردی گئی، اس کی خصوصی حیثیت اور دیگر آئینی حقوق چھین لیے گئے تھے۔ اس وقت ان روایتی سیاستدانوں نے خاموش رہنے میں ہی اپنی عافیت سمجھی۔۔ آج جب ووٹ لینے کی باری آئی تو وہ بڑے بڑے وعدے کرتے ہوئے آپ کے سامنے گڑ گڑارہے ہیں۔انہوں نے مزید کہا کہ آج ضمنی الیکشن ہے اور یہ واضح ہے کہ یہ انتخابات حکومت بنانے کے لیے نہیں ہیں، پھر بھی میں آپ سے اپیل کرتا ہوں کہ اپنی پارٹی کے امیدوار کو سپورٹ کریں تاکہ وہ آپ کے مسائل حکومت کے سامنے اٹھا سکے، اپنی پارٹی کے امیدوار مختار احمد ڈار آپ میں سے ہی ایک ہیں اور وہ آپ کے مسائل کو بخوبی سمجھتے ہیں۔بخاری نے کہا، ان جماعتوں اور ان کے رہنمائوں نے ہمیشہ جموں و کشمیر کے لوگوں کے مفادات کی قیمت پر نئی دہلی کے مفادات کی خدمت کی ہے۔ انہوں نے وزیر اعلیٰ اور صدر ریاست کے عہدوں کو ختم کرانے میں نئی دلی کی مدد کی۔ انہوں نے جموں کشمیر کو الیکشن کمیشن اور سپریم کورٹ کے دائرے میں لانے کیلئے اپنی خدمات دیں،تو پھر یہ اب کس منہ سے دفعہ 370 اور 35 اے کو واپس لانے کا کھوکھلا وعدہ کرتے ہیں۔انہوں نے مزید کہا، آج یہ لیڈران یہ تاثر دیتے ہیں کہ وہ جیلوں میں بند کشمیریوں کی رہائی چاہتے ہیں۔ کوئی ان سے پوچھے کہ اگر وہ کشمیریوں کو جیلوں میں نہیں دیکھنا چاہتے ہیں تو پھر ان کے ادوارِ حکومت میں لیڈروں اور عام نوجوانوں کو گرفتار کرکے مختلف جیلوں میں کیوں پہنچایا جاتا تھا؟ دراصل یہ لیڈران محض اپ کے ووٹ بٹورنے کیلئے آپ سے جھوٹے وعدے کررہے ہیں۔
