عظمیٰ نیوز سروس
سرینگر// وزیر اعلیٰ نے کہا ہے کہ حکومت جموں و کشمیرکے عوام کو درپیش مسائل و مشکلات سے بخوبی واقف ہے اور ان کے ازالے کیلئے ساری حکومتی مشینری متحرک ہے۔ انہوں نے یقین دلایا کہ عوامی فلاح و بہبود حکومت کی اولین ترجیحات میں شامل ہے۔عمر عبداللہ ہفتے کے روز نیشنل کانفرنس ہیڈکوارٹر پر پارٹی لیڈران، عہدیداران اور کارکنان کے ساتھ ایک تفصیلی اجلاس میں تبادلہ خیال کر رہے تھے۔اس موقع پر ملاقات کرنے والے وفود نے وزیر اعلیٰ کو مختلف علاقوں میں عوام کو درپیش بنیادی مسائل، ترقیاتی امور، اور دیگر مشکلات سے آگاہ کیا۔وزیر اعلیٰ نے انہیںیقین دلایا کہ حکومت تمام جائز عوامی مطالبات کو ترجیحی بنیادوں پر حل کرے گی اور ہر ممکن کوشش کی جائے گی کہ لوگوں کو سہولیات میسر ہوں۔ انہوں نے کہا’’ہمیں آپ کے مسائل کا مکمل ادراک ہے اور ان کا حل ہماری اولین ترجیح ہے‘‘۔عمر عبداللہ نے اس موقع پر تنظیمی معاملات اور پارٹی پروگراموں کے حوالے سے بھی مکمل تفصیلات حاصل کیں اور کارکنوں پر زور دیا کہ وہ نیشنل کانفرنس کی مضبوطی کیلئے مزید فعال کردار ادا کریں۔انہوں نے کہا ’’ ہمیں عوامی مسائل کو اجاگر کرنے میں ہر وقت پیش پیش رہنا چاہئے‘‘۔وزیر اعلیٰ نے پارٹی کارکنوں سے اپیل کی کہ وہ زمینی سطح پر عوام سے قریبی روابط قائم رکھیں اور ترقیاتی عمل کو موثر طریقے سے آگے بڑھانے میں حکومت کا ہاتھ بٹائیں۔
