عظمیٰ نیوزسروس
جموں// صدرِجموں وکشمیر نیشنل کانفرنس ڈاکٹر فاروق عبداللہ نے صوبہ جموں کے 7روزہ دورے کے پہلے روز بانہال، سنگلدان، رام بن اور بٹوت میں پارٹی عہدیداروں اور کارکنوں کی میٹنگ کی صدارت کی۔ انہوں نے پارٹی سرگرمیوں، پارٹی پروگراموں کے علاوہ حالیہ اسمبلی انتخابات میں پارٹی کی کارگردی کا جائزہ بھی لیا۔ اس موقعے پر ضلع صدر رام بن سجاد شاہین(ممبر اسمبلی بانہال) ،ممبراسمبلی رام بن ارجن سنگھ راجو، ڈی ڈی سی چیئرپرسن شمشاد شان ، سابق ممبر اسمبلی ڈاکٹر چمن لعل، عارف میر اور دیگر عہدیداران بھی تھے۔ اجلاسوں کے دوران پارٹی عہدیداروں اور کارکنوں نے پارٹی سرگرمیوں کے بارے میں صدر کو جانکاری دینے کے علاوہ اپنے اپنے علاقے کے لوگوں کے مسائل و مشکلات سے آگاہ کیا۔ ڈاکٹر فاروق عبداللہ نے سبھی شرکاء کو بغور سُنا اورانہیں یقین دہانی کرائی کہ نومنتخب عوامی حکومت ہر ایک شعبے کی بہتری کیلئے کام کریگی۔ انہوں نے کہاکہ گذشتہ 10سال سے جموں وکشمیر کے عوام کے مسائل و مشکلات جوں کے توں پڑے ہوئے ہیں اور ان طویل عرصہ کے دوران لوگوں کو صرف سبز باغ دکھائے گئے اور زبانی جمع خرچ سے کام چلایا گیا۔ ڈاکٹر فاروق عبداللہ نے کہا کہ جموں وکشمیر کے عوام کو پہاڑ نما مسائل و مشکلات کا سامنا ہے اور اس کیلئے حکومت کو دن رات کام کرنا پڑے گا۔ انہوں نے کہا کہ نیشنل کانفرنس نے عوام کو راحت پہنچانے کا وعدہ کیا ہے اور ہماری حکومت اپنے اس وعدے پر کاربند ہے۔ حکومت اور نومنتخب ممبران اسمبلی کی حد درجہ کوشش ہے کہ وہ لوگوں تک پہنچے اور ان کے مسائل و مشکلات کا ازالہ کریں۔ افسر شاہی اور عوامی منتخبہ عوامی میں زمین آسمان کا فرق ہوتا ہے اور لوگ عوامی حکومت کے قیام کے بعد تبدیلی محسوس کررہے ہیں، آج ہر ایک علاقے میں لوگوں کی بات سننے والے اور ان کو اُجاگر کرنے والے نمائندے 24گھنٹے دستیاب ہوتے ہیں۔ ڈاکٹر فاروق عبداللہ نے کہاکہ بجلی اور پینے کے پانی کی سپلائی میں بہتری اور فیس میں کمی، نوجوانوں کیلئے روزگار کے مواقع فراہم کرنا، پاسپورٹ اور نوکریوں کیلئے ویری فکیشن کے عمل کو آسان بنانا، نئی سڑکوں کی تعمیر اور پرانے رابطوں کی تجدید اور دیگر بنیادی ضروریات کی دستیابی حکومت کی اولین ترجیح ہے اور یہ سب اُسی صورت میں آسانی سے ممکن ہوسکتا ہے جب جموں وکشمیر کا ریاست کا درجہ بحال کیا جائے گا۔ ریاستی درجے کے بحالی سے ہی یہاں کی حکومت کیلئے عوامی راحت کے کام کرنا اور تمام خطوں کو نمائندگی دیناممکن ہوسکتا ہے۔ ڈاکٹر فاروق عبداللہ نے پارٹی سے وابستہ افراد پر زور دیا کہ وہ لوگوں کیساتھ قریبی رابطہ رکھیں اور آنے والے بلدیاتی اور پنچایتی اداروں کے انتخابات کیلئے آج سے ہی تیاری شروع کردیں۔
