عظمیٰ نیوزسروس
سرینگر// وزیر برائے تعلیم اور صحت سکینہ یتو نے پی ڈی پی کو ہدف تنقید بناتے ہوئے کہا کہ یہ پارٹی جموں و کشمیر کی سیاست میں غیر متعلق ہوئی ہے کیونکہ لوگوں نے اس کو رد کیا ہے ۔انہوں نے کہا کہ عمر عبداللہ کی قیادت والی سرکار لوگوں کی تمام ضروریات کو پورا کرنے کے لئے پر عزم ہے ۔موصوف وزیر نے ان باتوں کا اظہار جمعہ کو وسطی کشمیر کے ضلع بڈگام کے چاڈورہ علاقے میں ایک تقریب کے حاشیئے پر نامہ نگاروں کے ساتھ بات کرنے کے دوران کیا۔پی ڈی پی کے متعلق پوچھے جانے والے ایک سوال کے جواب میں انہوں نے کہا،’’پی ڈی پی کو لوگوں نے رد کیا ہے اب ان کو ہر چیز منفی نظر آ رہی ہے کوئی بھی چیز مثبت نہیں دکھائی دے رہی ہے ‘‘۔ان کا کہنا ہے کہ جموں و کشمیر میں جو ہر شعبے میں ترقی ہو رہی ہے وہ ان کو نظر ہی نہیں آ رہی ہے ۔سکینہ یتو نے کہا کہ عمر عبداللہ ایک مخلص لیڈر ہیں اور ان کی قیادت میں جموں وکشمیر میں ہر شعبے میں ترقی ہو رہی ہے ۔انہوں نے کہا،’’عمر صاحب لوگوں کی فلا ح و بہبود اور تعمیر ترقی کے لئے پر عزم ہیں‘‘۔
