عرسِ مبارک حضرت شیخ سید عبدالقادر جیلانیؒ | وادی بھر میں تقاریب ،خانیار اورسرائے بالامیںبڑے اجتماع

سرینگر//پیر کامل حضرت شیخ عبدالقادر جیلانی ؒ کے سالانہ عرس کے سلسلے میں وادی بھر میں تقریبات کا انعقاد کیا جارہا ہے ۔ سب سے بڑی تقریب آستان خانیار سرینگر اورسرائے بالا سرینگر میں منعقد کی گئیں جہاںہزاروں کی تعداد میں عقیدت مندوں نے حاضری دی ۔اس موقع پر زائرین کوحضرت شیخ سید عبدالقادر جیلانی ؒ کے تبرکات کے دیدار بھی کرائے گئے ۔ سالانہ تقریبات میں درودواذکار کی روح پرور مجالس کا انعقاد ہوا جس میںعقیدتمندوں کی بھاری تعدادنے شرکت کی اور دستگیر صاحب ؒ کے تبرکات کے دیدار سے فیضیاب ہوئے۔ حضرت شیخ سید عبدالقادر جیلانی ؒ کے سالانہ عرس کی اختتامی تقاریب کے موقع پر ہر سال کی طرح اس بار بھی اہل وادی نے جوش و خروش اور عقیدت و احترام کا بھرپور مظاہرہ کیا۔ اس حوالے سے سب سے بڑی تقریب زیارت خانیار سرینگرمیںمنعقد ہوئی جہاں ہزاروں عقیدت مندبشمول خواتین ذکر وازکار میں محو رہے ۔خانقاہ میںدن بھردرودواذکار اور ختمات المعظمات کی محفلیں آراستہ ہوئیں۔عرس کے سلسلہ میں سرائے بالا میں بھی عقیدتمندوں کی بڑی تعداد نے حاضری دی جس کے نتیجے میں علاقہ کی فضائیں روح پرور آوازوں سے گونجتی رہیں۔نماز فجر کے موقع پر خانیار اور سرائے بالا میں ہزاروں کی تعداد میں عقیدتمنددستگیر صاحبؒ کے تبرکات کے دیدار سے فیضیاب ہوئے اور یہ عمل ہر نماز کے بعد دہرایا گیا۔خانیارمیں ہزاروں لوگوں نے نماز فجر ادا کی جس کے بعد عقیدتمند تبرکات کے دیدار سے فیضیاب ہوئے۔اس دوران وادی کے مختلف علاقوں میںدن بھر لوگوں کی بھاری تعداد نے زیارت گاہ پر حاضری دی ۔ادھر آثارشریف پنجورہ شوپیان،خانقاہ دستگیرصاحبؒؒبارہمولہ،سونہ وار سرینگر،جناب صاحب صورہ،نادی ہل رفیع آباد،بانڈی پورہ ،کھرم سرہامہ، زچلڈارہ ہندوارہ، تجرشریف سوپور اور وادی کے دیگر کئی علاقوں کی مساجد ،خانقاہوں اور درگاہوں میں تقاریب منعقد ہوئیں۔سی این آئی