عاصف بٹ
کشتواڑ//میونسپل کمیٹی کے عارضی ملازمین کی کام چھوڑ ہڑتال مسلسل جاری رہی جسکے سبب قصبہ بھر میں گندگی کے ڈھیر جمع ہیں اور اب بیماریوں کے پھیلنے کا خطرہ لاحق ہوگیا ہے۔ گزشتہ تین روز سے میونسپلٹی کے عارضی ملازمین دفترمیں اپنی مانگوں کو لیکراحتجاج کررہے ہیں۔احتجاجی ملازمین نے بتایا کہ جب تک سرکار وانتظامیہ انکے مطالبات کو حل نہیں کرےگی تب تک احتجاج بدستور جاری رہے گا۔ملازمین نے بتایا کہ محکمہ میں گزشتہ چار دہائیوںسے ملازمین عارضی طور کام کررہے ہیں جبکہ انکے مطالبات کو پورا کرنے کے بجائے انہیںبنیادی حقوق سے محروم رکھا جارہا ہے ۔ انھوں نے بتایا کہ گزشتوں کئی برسوں سے انکے مطالبات کو حل نہیں کیاجارہا ہے اور انہیںمسلسل احتجاج کرنے پر مجبور کیاجارہاہے ۔انکاکہناتھا’’ ہم اعلیٰ حکام سے جلد مطالبات پورا کرنے کا مطالبہ کرتے ہیں،بصورت دیگر ہم اپنے بچوں کے ساتھ سڑکوں پر آکر احتجاج کرینگے‘‘۔ ملازمین کی ہڑتال کے سبب قصبہ میں جگہ جگہ گندگی کےڈھیر جمع ہوئے ہیں جن سے اب بدبو پھیل رہی ہے۔اگرچہ چند مقامات پر مقامی لوگوں نے صفائی عمل میں لائی تاہم بیشتر مقامات پر گندگی کے ڈھیر جمع ہیںاور قصبہ کی گلی کوچوں کے اندر سے گزرنا انتہائی مشکل ہوگیا ہے ۔لوگوں نے انتظامیہ سے جلد کوئی قدم اٹھانے کا مطالبہ کیا اور قصبہ میں جمع گندگی کو جلد صاف کرنے کا مطالبہ کیا ۔
