نیوز ڈیسک
نئی دہلی //کشمیری تاجر ظہور احمد شاہ وٹالی نے قومی تحقیقاتی ایجنسی (این آئی اے) کے ذریعہ زیر تفتیش دہشت گردی کی مالی معاونت کے ایک معاملے میں ٹرائل کورٹ کی طرف سے ان کے خلاف لگائے گئے الزامات کے خلاف دہلی ہائی کورٹ کا رخ کیا۔اسے 2017 میں این آئی اے نے غیر قانونی سرگرمیاں روک تھام ایکٹ (یو اے پی اے) کی مختلف دفعات کے تحت دہشت گرد اور علیحدگی پسند سرگرمیوں سے متعلق ایک معاملے میں گرفتار کیا تھا۔پچھلے سال مئی میں این آئی اے کورٹ (ٹرائل کورٹ) نے وٹالی اور دیگر کے خلاف آئی پی سی اور یو اے پی اے کی مختلف دفعات کے تحت الزامات طے کیے تھے۔عدالت نے فاروق احمد ڈار عرف بٹا کراٹے، شبیر شاہ، مسرت عالم، محمد یوسف شاہ، آفتاب احمد شاہ، الطاف احمد شاہ، نعیم خان، محمد اکبر کھانڈے، راجہ معراج الدین کلوال، بشیر احمد کے خلاف باقاعدہ طور پر الزامات طے کیے تھے۔ محمد یاسین ملک نے اسی معاملے میں این آئی اے عدالت کے سامنے الزامات کے تحت قصوروار ٹھہرایا تھا۔ بعد میں اسے مجرم قرار دے کر عمر قید کی سزا سنائی گئی۔جسٹس سدھارتھ مردول اور جسٹس تلونت سنگھ کی بنچ نے منگل کو اس معاملے میں قومی تحقیقاتی ایجنسی (این آئی اے) سے جواب طلب کیا اور اسے 3 مئی 2023 کو سماعت کے لیے درج کر دیا۔
