عاصف بٹ
کشتواڑ//محکمہ موسمیات کی پیشگوئی کے عین مطابق ضلع کشتواڑ کے بالائی علاقہ جات میں برفباری جبکہ میدانی علاقوں میں بارشوں کا سلسلہ جمعہ کی صبح شروع ہوا جو دن بھر جاری رہا۔تفصیلات کے مطابق جمعہ کی صبح سے ہی بالائی علاقوں میں برفباری کاسلسلہ شروع ہوا جو دن بھر جاری رہاجبکہ میدانی علاقوں میں موسلادھار بارشیں ہوتی رہی ۔ضلع کے دورافتادہ علاقہ سب ڈویژن مڑواہ کے مڑواہ واڑون و دچھن میں کئی انچ تازہ برفباری درج ہونے کی اطلاع ملی ہےجس سے علاقے میں عام زندگی بری طرح مفلوج ہوکررہ گئی ہے اور لوگ گھروں میں محصور ہوکررہ گئے ہیں ۔ واڑون میں پانچ انچ سے زاید جبکہ مڑواہ میں چار و دچھن میں دو انچ برفباری درج کی گئی ۔سب ڈویژن پاڈر کے مچیل علاقے میں جمعہ کی صبح کی تین انچ تازہ برفباری درج کی گئی جس سے عوام کو سخت مشکلات کا سامنا کرنا پڑا ۔ضلع کے دیگر علاقہ جات کیشوان کنتواڑہ ،بونجواہ، سروڑ میں بھی تین انچ کے قریب برفباری کی اطلاع ملی ۔چھاترو، چنگام و مغلمیدان کے اوپری مقامات پر بھی تین سے چار انچ تازہ برفباری کی اطلاع موصول ہوئی ہے۔ سب ڈویژن چھاترو سے ملی تفصیلات کے مطابق وٹسر تک قریب تین انچ برفباری ہوئی ہے جبکہ اوپری مقامات آلوفارم پر ایک فٹ کےقریب برفباری کی اطلاع ملی۔میدانی علاقوں میں دن بھر موسلادھار بارشیں ہوتی رہی جسکے سبب عوام کو سخت مشکلات کا سامنا کرنا پڑا۔قصبہ میں متعدد مقامات پر ناقص ڈرینج کے سبب سڑکوں پر گندہ پانی جمع ہوگیا جس سے عوام کو چلنے میں سخت دشواریاں پیش آئیں۔اس دوران سنتھن و مرگن ٹاپ سڑکوں پر تازہ برفباری کے بعد انتظامیہ نے انھیں آمدورفت کیلئے بند کردیا ۔سنتھن ٹاپ پر ایک فٹ سےزاید برفباری ہوئی جبکہ مرگن ٹاپ پر بھی آٹھ سے دس انچ تک برفباری کی اطلاع ملی ہے۔ ضلع کے بیشتر اندرونی سڑک رابطوں پر بلاخلل ٹریفک کی نقل و حرکت جاری رہی ۔ آخری اطلاع ملنے تک برفباری وبارشوں کا سلسلہ جاری تھا۔
