صورہ سے پاندچھ ناگہ بل تک طبی سہولیات کا فقدان لاکھوں افراد پر مشتمل علاقوں میں ایک بھی ڈسپنسری نہیں

عظمیٰ نیوز سروس

سرینگر//صورہ سے پاندچھ ناگہ بل تک لاکھوں نفوس پر مشتمل آبادی کیلئے ایک بھی ڈسپنسری یا اور کوئی سرکاری طبی ادارہ نہ ہونے کے باعث مریضوں کو شدید دشواریوں کا سامنا کرنا پڑرہا ہے۔مقامی خبر رساں ادارے ’سی این آئی‘ کے مطابق صورہ ہسپتال کو چھوڑ کر صورہ ، بژھ پورہ، الٰہی باغ، عمر ہیر، نیو عمر ہیر ، پاندچھ ، 90فٹ اور ناگہ بل تک کئی علاقے آتے ہیں جن کی آبادی لاکھوں لوگوں پر مشتمل ہے تاہم ان علاقوں میں سرکار کی جانب سے ایک بھی ڈسپنری قائم نہیں کی گئی ہے جس کی وجہ سے لوگوں کو پریشانیوں کا سامناہے ۔ مقامی لوگوں کے مطابق بژھ پورہ، عمر ہیر اور 90فٹ کے لوگوں کو گاندربل سب ضلع ہسپتال جانا پڑتا ہے۔ اسی طرح پاندچھ اور دیگر لوگوں کو بھی اسی طرح دیگر علاقوں کا رخ کرنا پڑتا ہے جو ان کیلئے باعث پریشانی ہے ۔ مذکورہ علاقہ جات کے لوگوں نے اس سلسلے میں محکمہ صحت کے خلاف ناراضگی کااظہار کرتے ہوئے کہا کہ ایک طرف محکمہ لوگوں کو طبی سہولیات فراہم کرنے کا دعویٰ کررہا ہے تو دوسری طر ف ان علاقوں کیلئے کوئی بھی طبی ادارہ قائم نہیں کیا گیا ہے ۔ لوگوں کا کہناہے کہ سرکاری سطح پر کوئی سہولت نہ ہونے کی وجہ سے انہیںپرائیویٹ کلینکوںکا رخ کرنا پڑتا ہے جہاں علاج پر خطیر رقم خرچ ہوتی ہے ۔