صدر جمہوریہ ہند کا انتخاب

نیوز ڈیسک
سرینگر// نیشنل کانفرنس صدر ڈاکٹر فاروق عبداللہ نے اپنے ایک بیان میں کہاہے کہ یہ میرے لئے اعزاز کی بات ہے کہ صدرِ جمہوریہ ہند کے عہدے کیلئے اپوزیشن کے ممکنہ مشترکہ اُمیدوار کے طور پر ممتا بینرجی نے میرا نام تجویز کیاہے۔انہوں نے کہا کہ ممتا بینر جی کی طرف سے میرا نام تجویز کرنے کے بعد، مجھے اپوزیشن لیڈروں کی طرف سے کئی فون کالز موصول ہوئے ہیں جن میں میری امیدواری کی حمایت کی پیشکش کی گئی ہے۔میں نے اس غیر متوقع پیش رفت پر اپنے خاندان اور سینئر ساتھیوں کے ساتھ بات کرنے کے لئے کچھ دن لئے ہیں۔بقول ڈاکٹر فاروق’’جو حمایت مجھے حاصل ہوئی ہے میں اس سے بہت ہی زیادہ متاثر ہوا ہوں ،مجھے ملک کے اعلیٰ ترین عہدے کے قابل سمجھنا میرے لئے ایک اعزاز کی بات ہے، میں سمجھتا ہوں کہ جموں و کشمیر ایک نازک موڑ سے گزر رہا ہے اور یہاں اس غیر یقینی صورتحال سے نجات حاصل کرنے میں میری کوششوں کی ضرورت ہے، میرے سامنے ابھی بہت ہی سرگرم سیاست ہے اور میں جموں و کشمیر اور ملک کی خدمت میں مثبت حصہ ادا کرنے کا منتظر ہوں،اس لئے میں احترام کے ساتھ اپنا نام ممکنہ اُمیدواروں سے واپس لینا چاہوں گا اور میں مشترکہ اپوزیشن کے متفقہ امیدوار کی حمایت کا منتظر ہوں‘‘۔ڈاکٹر فاروق کے مطابق’’میں میرا نام تجویز کرنے کے لئے ممتا بینر جی کا بہت مشکور ہوں، میں ان تمام سینئر رہنماؤں کا بھی مشکور ہوں جنہوں نے مجھے اپنی حمایت کی پیشکش کی ہے‘‘۔