سرینگر//متحدہ جہاد کونسل کے چیئرمین اور حزب سربراہ سید صلاح الدین نے محمد اشرف صحرائی کی تحریک حریت چیئرمین تقرری کو مستحسن اقدام قرار دیاہے۔انہوں نے کہاکہ صحرائی کی تقرری سے تحریک آزادی کشمیر پر مثبت اثرات مرتب ہونگے ۔جہاد کونسل ترجمان سید صداقت حسین کی جانب سے موصولہ بیان میں کہا گیا ہے کہ صلاح الدین نے کہا کہ محمد اشرف صحرائی کی پوری زندگی اسلام اور آزادی کے لئے و قف رہی ہے اور ان میں قائدانہ صلاحیتیں بدرجہ اتم موجود ہیں ۔انہوں نے کہا’’ امید ہے کہ سید علی گیلانی کی سر پرستی میں محمد اشرف صحرائی تحریک آزادی کشمیر کو منزل سے ہمکنار کرنے میں بھر پور کردار ادا کرنے میں کامیاب ہونگے ‘‘۔ انہوں نے کہا کہ مسلمہ اور جانثار قیادت ہی موجودہ جدوجہد کو منزل پر لیجانے کی صلاحیت رکھتی ہے اور اللہ کا فضل ہے کہ کشمیری قوم اس معاملے میں بانجھ نہیں ۔ حزب سربراہ نے کہاکہ تاریخ گواہ ہے کہ1947 سے با لعموم اور1989 سے بالخصوص کشمیر ی قوم نے بے مثال قربانیوں کی تاریخ رقم کی ہے ۔بیان کے مطابق جہاد کونسل سربراہ نے اس عزم کا اظہار کیا کہ حریت پسند عوام کی قربانیاں ضرور رنگ لائیں گی۔(کے این ایس)
صحرائی کی چیئرمین تقرری مستحسن اقدام:صلاح الدین
