وزیر اعلیٰ کے ہاتھوںبرزلہ ہسپتال میں 120بستروں پر مشتمل جدید بلاک کا اِفتتاح
سرینگر// وزیر اعلیٰ عمر عبداللہ نے کل بون اینڈ جوائنٹ ہسپتال سری نگر میں 120 بستروں پر مشتمل جدید اِضافی بلاک کا اِفتتاح کیا اور حکومت کی صحت و تعلیم کے دو بنیادی ستونوں کو مستحکم کرنے کے عزم کا اعادہ کیا۔وزیر اعلیٰ نے اِفتتاح کے بعد آپریشن تھیٹرز، سیڑھیوں، ریمپ اور وارڈوں کا معائینہ کیا اور ہسپتال کے عملے اور فیکلٹی ممبران سے بات چیت کی۔اِس موقعہ پراُنہوں نے ایک بڑے اِجتماع سے خطاب کرتے ہوئے کہا کہ بنیادی ڈھانچے کی کوئی بھی ترقی چاہے وہ سڑکیں ہوں ، بجلی کے منصوبے ہوں یا کمرشل کمپلیکس ہوں، یہ معیاری صحت و تعلیم کا نعم البدل نہیں ہو سکتے۔ اُنہوں نے کہا،’’جب تک ہمارے سکول، کالج، یونیورسٹیاں اور ہسپتال مضبوط نہیں ہوں گے، ہماری سماجی ترقی مکمل نہیں ہو سکتی۔‘‘اُنہوںنے 2014 ء کے سیلاب کو یاد کرتے ہوئے کہا کہ سب سے پہلے بون اینڈ جوائنٹ ہسپتال ہی پانی میں آیا تھا۔ اُنہوں نے کہا،’’میں اس پل کے نیچے کھڑا تھا، ہسپتال کو بچانے کی کوشش کر رہا تھا۔ لیکن اس کے باوجود بھی ہسپتال نے لوگوں کو علاج فراہم کرنا بند نہیں کیا۔‘‘وزیر اعلیٰ عمر عبداللہ نے 2022 ء کی آگ کا بھی ذِکر کیا جس میں ہسپتال کے چار آپریشن تھیٹرز، ریفرل رومز، تدریسی شعبے اور کئی وارڈز تباہ ہو گئے تھے۔اُنہوں نے کہا،’’چھ ماہ تک چھت نہ ہونے کے باوجود، ڈاکٹروں اور اِنتظامیہ نے چند دنوں میں ہی دوبارہ سرجریاں شروع کیں۔ یہ ان کی بے مثال لگن کا ثبوت ہے۔‘‘وزیر اعلیٰ نے ایک ذاتی واقعہ اشتراک کرتے ہوئے بتایا کہ وہ خود بھی ہسپتال میں مریض رہ چکے ہیں۔ اُنہوں نے مسکراتے ہوئے کہا،’’ہسپتال کے ماہر سرجنوں کی بدولت میں آج 55 برس کی عمر میں بھی 10 سے 12 کلومیٹر دوڑ سکتا ہوں۔‘‘اُنہوں نے نئے بلاک کے لئے عملے کی فوری ضرورت پر زور دیا اور متعلقہ محکموں کو ہدایت دی کہ جلد از جلد تقرریاں عمل میں لائیں۔ اُنہوںنے زور دے کر کہا،’’یہ رِبن کاٹنا صرف فوٹو کے لئے نہیں تھا۔ یہ تب ہی معنی رکھتا ہے جب یہاں آپریشن تھیٹرز فعال ہوں اور ہماری فیکلٹی مستقبل کے ڈاکٹروں کو تعلیم دے رہی ہو۔‘‘ عمر عبداللہ نے سری نگر میں نکاسی آب کے مسائل کی نشاندہی کے لئے خصوصی سروے کا اعلان کیا۔ اُنہوں نے کہا کہ ایک جامع منصوبہ بنایا جائے گا تاکہ شہر کو حقیقی معنوں میں ’’سمارٹ سٹی‘‘ بنایا جا سکے۔اُنہوں نے مزید کہا کہ شہر میں ٹریفک کے دبائو کو کم کرنے کے لئے دو سے تین بڑے بنیادی ڈھانچے کے منصوبے جلد شروع کئے جائیں گے۔ اِس موقعہ پر نائب وزیر اعلیٰ سریندر کمار چودھری،وزیر برائے صحت و طبی تعلیم سکینہ اِیتو ، وزیر اعلیٰ کے مشیر ناصر اسلم وانی، رُکن اسمبلی لال چوک شیخ احسان پردیسی، سیکرٹری صحت و طبی تعلیم ڈاکٹر سیّد عابد رشید شاہ اور دیگر معززین نے بھی خطاب کرتے ہوئے ہوئے اس منصوبے میں شامل انتظامیہ اور ہیلتھ کیئر ورکروں کی کاوشوں کو سراہا۔
