صبر وو برداشت صفت ِ اعلیٰ ہے

آج اگر کوئی سوال کرےکہ ہماری معاشرتی زندگی کا سب سے بڑا مسئلہ کیا ہے تواس کا مختصر اور جامع جواب یہی ہوگا کہ صبر اور برداشت کا فقدان ۔ یہ ایک ایسا مسئلہ ہے ، جس نے اوپر سے نیچے تک پورے معاشرے کا احاطہ کررکھا ہے اور گہرائی سے جائزہ لیا جائے تو یہ حقیقت سامنے آئے گی کہ ہماری معاشرتی زندگی کو لاحق تمام مسائل کہیں نہ کہیں جاکر اسی ایک نکتے سے وابستہ ہیں اور اسی کے بطن سے پھوٹتے ہیں۔ گویا صبروتحمل کا فقدان ہمارے معاشرے کےلیے ام المسائل کا مقام رکھتا ہے۔صبر وتحمل اعلیٰ درجے کی اخلاقی صفت نمایاں ہوکر بروئے کار آتی ہے، اس کے اندر وقار، ٹھہراو، بردباری اور حلم برگ وبارلاتے ہیں اور ایسا معاشرہ یا فرد ہر قدم ٹھہر ٹھہر کر، اچھی طرح ناپ تول اور سوچ سمجھ کر اُٹھاتا ہے۔ ٹھنڈے دماغ سے ہر واقعے پر غور وفکر کرتا ہے، تدبر سے کام لیتا ہے، مشاورت کرتا ہے، اس کے اثرات ومضمرات کاجائزہ لیتا ہے اور پھر اس کا مقابلہ کرنے کےلیے جوسب سے بہتر تقاضا ہوتا ہے، اس کے مطابق قدم اٹھاتا ہے۔ اس کے برعکس جس معاشرہ میں صبر وبرداشت کی صفت نہ پائی جائے، اس کے بجائے وہ عجلت میں کام نکالنے کی عادی ہو، ایسا معاشرہ کسی دُوررس اور صائب فیصلے تک کبھی نہیں پہنچ سکتا ۔اس کی نظر لمحہ موجود پرہی رہتی ہے، اس کی خواہش ہوتی ہے کہ کسی طرح کام نکلے اور وقت ٹلے ۔ ایسی سوچ اور عادات وصفات کا حامل معاشرہ کسی کام میں کامیاب ہوسکتا ہے نہ ترقی کی شاہراہ پر آگے بڑھ سکتا ہے۔صبر کے ساتھ ساتھ برداشت کی بھی انفرادی اور اجتماعی انسانی زندگی میں بڑی اہمیت ہے۔ صبر کی طرح برداشت بھی کئی لباس میں جلوہ گر ہوتا ہے۔ ایک برداشت یہ ہے کہ ایک فرد کو دوسرے فرد کے ہاتھوں صدمہ پہنچے تو وہ اسے برداشت کرے، کسی سے خلاف طبع بات سُنے تو بجائے ردعمل دینے کے برداشت کرے اور کوئی آپ کے موقف، فکر ، نظریہ اور خیال سے مختلف رائے اور خیال اختیار کرے تو آپ اسے برداشت کریں اور اس کا حق اختلاف تسلیم کریں۔یہ اسلامی تعلیمات کے مطابق صبر و برداشت اور تحمل کا بنیادی تقاضا ہے۔معاشرتی زندگی میں صبر وبرداشت ایک فرد کے مقابلے میں زیادہ اہمیت رکھتے ہیں اور فرد کے مقابلے میں معاشرہ کی اجتماعی زندگی میں صبر وبرداشت کی کہیں زیادہ ضرورت ہوتی ہے ، بلکہ یہ کہا جائے تو بے جا نہ ہوگا کہ قدم قدم پر اس کی ضرورت ہے۔ آج دیکھئے کہ ہم صبروبرداشت نہ کرنے کی وجہ سے کہاں کھڑے ہیں؟ اجتماعی اسٹیج پر دیکھا جائے تو صورتحال یہ ہے کہ ایک دوسرے کو برداشت کرنے کوتیار نہیں۔کسی شخص کی کامیابی اور بلندی کا راز یہ ہے کہ انتہائی جذباتی مواقع پر انتہائی عقل و دانش سے فیصلہ کرے۔ انفرادی زندگی میں تحمل اور صبر و ضبط کی ضرورت تو ہے ہی، لیکن اس کی اہمیت اجتماعی جگہوں میں مزید بڑھ جاتی ہے۔ اگر تحمل اور صبر و ضبط سے کام نہ لیا جائے توزندگی گزارنامشکل ہوجائے۔ اپنی شخصیت کو نکھارنے، مسائل سے نجات پانے اور خوش گوار زندگی گزارنے کے لیے ضروری ہے کہ جذبات کو قابو میں رکھا جائے۔ صبرو تحمل کا وصف انتہائی مفید و معنی خیز ہے، اس سے سعادت و بھلائی اورسکون و اطمینان کے مواقع تو ہاتھ آتے ہی ہیں، ساتھ ہی صبر و استقامت کی راہ پر چل کر لوگوں کی قیادت و امامت کا درجہ بھی حاصل کیا جاسکتا ہے۔ اس لیے ضرورت ہے کہ تمام شعبہ ہائے حیات میں صبر و تحمل سے کام لیا جائے، پرسکون اور کامیاب زندگی کے لیے صبر و تحمل اور قوتِ برداشت بنیادی عنصر ہے۔ ہماری پستی کی ایک بڑی وجہ یہ ہے کہ ہم وقتی طورپر جذبات کی رَو میں بہہ جاتے ہیں، جس سے دُوررس نگاہ متاثر ہوجاتی ہے اور سوچ و تدبّر کا مزاج نہیں رہتا۔ موجودہ حالات میں خاص طورپر ہمیںسیرتِ نبویؐ کے پہلو کو اپنانے کی شدید ضرورت ہے۔آج معاشرے کو جس قدر اپنی اجتماعی زندگی میں صبروبرداشت کی ضرورت ہے، حقیقت یہ ہے کہ اس سے پہلے اس کی اتنی ضرورت کم ہی پیش آئی ہے۔ آج ہمیں اپنے ناکافی وسائل اور کمزور نظام کے ساتھ طرح طرح کی خطرناک بیماریوں کا مقابلہ کرنا ہے۔ یہ وقت ہے کہ پورا معاشرہ ایک ہو۔ تمام اختلافات بالائے طاق رکھے جائیں ۔ہم ایک معاشرہ ہیں، ہمارا جینا مرنا ایک ساتھ ہی ہے۔ اس حقیقت کے پیش نظر ضرورت اس امر کی ہے کہ تمام لوگ ایک پیج پر آجائیں، کوئی دوسرے کو زیر کرنے کی سوچ نہ پالے۔ صبروبرداشت کے ذریعے ہی ہم سرخرو ہوسکتے ہیں ۔