حسین محتشم
پونچھ// شہید ڈی ایس پی منجیت سنگھ میموریل کرکٹ ٹورنامنٹ کے پہلے ایڈیشن کا سلسلہ پونچھ کے اسپورٹس اسٹیڈیم میں دوسرے راؤنڈ میں داخل ہو گیا ہے۔ اس ٹورنامنٹ کا افتتاح ایس ایس پی پونچھ شفقت حسین 27 مارچ 2025 کوکیا۔بتا دیں کہ اس ٹورنامنٹ میں ضلع پونچھ کی 32 ٹیمیں مقابلہ کر رہی ہیں۔دوسرے راؤنڈ کے پہلے میچ میں اسٹار وائپر نے پانچ وکٹوں سے فتح حاصل کی۔ ڈیئر ڈیول کلب نے پہلے بیٹنگ کرتے ہوئے 18.2 اوورز میں 113 رنز بنائے۔ شعیب 27 رنز کے ساتھ ٹاپ سکورر رہے جبکہ راشد علی نے 22 رنز بنائے۔ سٹار وائپر کے باؤلنگ اٹیک کی قیادت سکندر نے کی جس نے چار وکٹیں حاصل کیں اور آصف نے دو وکٹیں حاصل کیں۔ ہدف کا تعاقب کرتے ہوئے سٹار وائپر نے مطلوبہ مجموعے کو 16.1 اوورز میں پورا کر لیا، محبوب نے 32 اور جاوید نے 21 رنز بنائے۔ دن کے دوسرے میچ میں وائی سی سی نے سٹار کلب سینئر کو دو وکٹوں سے شکست دی۔ ٹاس جیت کر اسٹار کلب سینئر نے 17.2 اوورز میں 100 رنز کا ہدف دیا جس میں شبیر اور ذوالفقار نے بالترتیب 18 اور 15 رنز بنائے۔ وائی سی سی کی بولنگ جوڑی، نقوی اور وحید نے تین تین وکٹیں حاصل کیں۔ YCC نے کاشف کے 28 رنز اور امان کے 18 رنز کی بدولت 17.4 اوورز میں ہدف کامیابی سے حاصل کر لیا۔ سٹار کلب سینئر کے ابرار اور محمود دو دو وکٹیں لینے میں کامیاب رہے۔اس دوران ایس ایس پی پونچھ شفقت حسین نے ٹیموں کے ساتھ بات چیت بھی کی۔ ان کے ساتھ پون کمار پی ای ایل، پرویز احمد ملک، محمد یوسف اور رام پرکاش بھی موجودتھے۔ میچوں میں مقامی کمیونٹی کے ارکان نے بھی شرکت کی، جنہوں نے ٹورنامنٹ کے متحرک ماحول میں حصہ لیا۔ اس ٹورنامنٹ کا انعقاد ضلع پولیس پونچھ نے سوک ایکشن پروگرام (سی اے پی) کے تحت شہید ڈی وائی ایس پی منجیت سنگھ کو خراج عقیدت پیش کرنے کے لئے کیا ہے۔ اس کا مقصد پونچھ کے نوجوانوں کو اپنی صلاحیتوں کا مظاہرہ کرنے اور اپنی توانائی کو مثبت انداز میں استعمال کرنے کے لیے ایک پلیٹ فارم فراہم کرنا ہے۔
