شہر ِ خاص کی عظمت ِ رفتہ کی بحالی کے وعدہ بند:اپنی پارٹی

سرینگر//اپنی پارٹی نے کہا ہے کہ مکینوں کیلئے سازگار ماحول قائم کرکے شہر ِ خاص کی عظمت ِ رفتہ کو بحال کرنے کی وعدہ بند ہے۔حلقہ خانیار کے مختلف علاقہ جات سے ورکروں سے ایک میٹنگ سے خطاب کرتے ہوئیاپنی پارٹی کے ریاستی سیکریٹری و پارٹی ضلع صدر بڈگام منتظر محی الدین نے کہاکہ ’’اپنی پارٹی کی قیادت شہر ِ خاص کی کھوئی ہوئی عظمت کو بحال کرنے کی وعدہ بند ہے۔انہوںنے کہاکہ’ ہم اس مقصد کے حصول کے لئے ہرممکن کوشش کریں گے تاکہ سبھی مکینوں خاص کر کاریگرطبقہ کو فائدہ پہنچے جنہیں بدقسمتی سے آج تک نظر انداز کیاگیا‘۔ انہوں نے کہاکہ اپنی پارٹی اِس پر کام کر رہی ہے کہ کاریگروں کے قرضہ جات معاف کروائے جائیں تاکہ اس طبقہ کی مشکلات میں کمی واقع ہو جو بلاواسطہ یا بلواسطہ طور پر دستکاری شعبہ سے منسلک ہیں۔ انہوں نے مزید کہا’’اپنی پارٹی صدر سعید محمد الطاف بخاری نے کاریگروں کے قرضہ جات معاف کرنے کا معاملہ لیفٹیننٹ گورنر سربراہی والی انتظامیہ اور مرکزی حکومت کی نوٹس میں لایا ہے اور اِس ضمن میں جلد اچھی خبر ملنے کی توقع ہے‘‘۔انہوں نے کہاکہ شہر ِ خاص کے شہریوں کے لئے مناسب ہاؤسنگ پالیسی نہیں اور پچھلی کئی دہائیوں سے کوئی سنجیدہ کوشش نہیں کی گئی کہ علاقہ میں بھیڑ بھاڑ کم کر کے یہاں پر بہتر شہری سہولیات فراہم کی جائیں۔میٹنگ سے پارٹی یوتھ لیڈران مظفر ریشی، خالد راٹھور، محسن ظفر شاہ، امتیاز راتھر، اعجاز راتھر اور عمران بھٹ نے بھی خطاب کیا۔ادھر ضلع صدر سرینگر نور محمد شیخ نے خطاب کرتے ہوئے خانیار میں مقامی شہریوں کے لئے انتھک کام کرنے اور پارٹی کو مضبوط کرنے کے لئے اُن کی کوششوں کو سراہا۔ انہوں نے کہاکہ ’’شہرِ خاص کی اپنی ایک تاریخ ہے، یہ صدیوں سے تجارت وکاروبار کا مرکز رہا ہے لیکن پچھلے کچھ عرصہ سے متعلقہ انتظامیہ کی لاپرواہی اور غیر سنجیدگی کی وجہ سے شہر خاص کو ترقی میں وہ حصہ نہیں مل سکا، جس کا یہ مستحق ہے۔ انہوںنے کہاکہ کاریگر اور دستکار ،جن کا تعلق اِن علاقہ جات سے ہے ، پریشان حال ہیں جنہیں حکومت کی طرف سے امداد کی ضرورت ہے۔نور محمد شیخ نے کہاکہ اس کے علاوہ ہینڈی کرافٹ سیکٹر کی احیاء کی ضرورت ہے، اپنی پارٹی اِس کو دیکھے گی کہ وہ اِس تاریخی صنعت کے احیاء کیلئے سرکاری اسکیموں کی جامع عملی آوری ہو۔