عظمیٰ نیوز سروس
سرینگر//سرینگر میونسپل کارپویشن (ایس ایم سی) کے کمشنر اویس احمد نے اتوار کے روز کہاکہ سرینگر میں برف ہٹانے کا کام شدومد جاری ہے اور تمام تر مشینری اور افرادی قوت کو بروئے کارلایا جارہا ہے۔انہوں نے کہا کہ شہر میں میونسپل سطح پر ایک کنٹرول روم بھی قائم کیا گیا ہے۔کمشنر نے ان باتوں کا اظہا ر اتوار کو یہاں نامہ نگاروں کے ساتھ بات کرنے کے دوران کیا۔انہوں نے کہا’’اتوار کی صبح سے 47مشینوں کو کام پر لگا دیا گیا ہے اور 28سو ملازمین شہر کے ہر وارڈ میں اپنی خدمات انجام دے رہے ہیں‘‘۔ان کے مطابق سرینگرکے چودہ سو کلومیٹر روڈ پر برف صاف کرنے کا کام جاری ہے۔ کمشنر موصوف نے کہاکہ پانی کی نکاسی کیلئے مشینوں کا بندوبست کیا گیا ہے اور اس حوالے سے 147موبائل پمپ مختلف علاقوں میں کام کر رہے ہیں۔اویس نے لوگوں سے اپیل کی کہ وہ سڑکوں اور گلی کوچوں میں اپنی گاڑیوں کو پارک کرنے سے پر ہیز کریں تاکہ ہمارے عملے کو وقت ضرورت دقتوں کا سامنا نہ کرنا پڑے۔انہوں نے پیر دستگیر صاحبؒ خانیار، گردوارہ چھٹی پادشاہی رعناواری اور امام بارگاہ حسن آباد کابھی دورہ کیا۔ایس ایم سی کمشنر نے صدر ہسپتال سرینگراور جواہر لال نہرو میموریل ہسپتال رعناواری کا بھی دورہ کیا ۔
