راجکوٹ، 05 نومبر (یو این آئی) ہندوستانی کپتان وراٹ کوہلی نے دوسرے ٹوئنٹی 20 میچ میں نیوزی لینڈ سے ملی 40 رن کی شکست کے بعد بلے بازی کو ذمہ دار ٹھہرایا ہے ۔نیوزی لینڈ نے کولن منرو کی ناٹ آؤٹ 109 رنز کی طوفانی اننگز کے دم پر دو وکٹ پر 196 رن کا مضبوط اسکور بنایا اور پھر میزبان ہندستان کو مقررہ 20 اوور میں سات وکٹ پر 156 رن پر روک کر 40 رنز سے میچ اپنے نام کر لیا۔ہندستانی اننگز میں وراٹ نے 42 گیندوں میں آٹھ چوکوں اور ایک چھکے کی بدولت 65 رنز اور مہندر سنگھ دھونی نے 37 گیندوں میں 49 رن بنائے ۔دھونی اننگز کے آغاز میں سست رہے ۔میچ کے بعد وراٹ نے کہاکہ نیوزی لینڈ نے ایک شاندار مظاہرہ کیا۔ہم نے کچھ کیچ ڈراپ کئے جس کا ہمیں آخر میں خمیازہ بھگتنا پڑا ۔ہم نے انہیں 200 کے اسکور کے اندر روکا جبکہ ایک وقٹ ایسا لگ رہا تھا کہ وہ 225 سے زائد رنز بنالیں گے اس کا کریڈٹ بمراہ اور بھووی کو جاتا ہے ۔ اپنی ٹیم کی بلے بازی سے کچھ مایوس نظر آئے وراٹ نے کہاکہ جب آپ بڑے ہدف کا تعاقب کر رہے ہو تو تمام بلے بازوں کو اسکور کرنا ہوتا ہے یا کسی ایک بلے باز کو 200 کے اسٹرائک ریٹ سے رن بنانے ہوتے ہیں۔میں نے اپنی پوری کوشش کی۔دھونی نے آخر میں اچھا کھیل دکھایا، لیکن آخر میں ہدف نمایاں طور پر بڑھ گیا ۔ہندستانی کپتان نے کہاکہ ہم آج بھی اچھا نہیں کھیل سکے اور شاٹس بھی خراب رہے ۔
ایسا ہوتا ہے جب آپ ایک بڑا شاٹ کھیلتے ہیں تو ایسی صورتحال کا سامنا ہوسکتا ہے ۔ہماری شروعات بھی اچھی نہیں رہی جس سے ٹیم پر دباؤ آ گیا۔لیکن یہ بھی ایک سبق ہے اور ٹیم فیصلہ کن ون ڈے میں اس سے سبق لے گی۔یو این آئی
